Online Reporter
Veronica Gwaze ari kuPOLOKWANE, South Africa
CHIKWATA chenyika chemaMighty Warriors chakasvika kuSouth Africa chiine chivimbo chikuru chokuti chicharwa semvumba apo chiri kupinda mumutambo weCOSAFA Women’s Championship.
Chine vatambi vechidiki pachiri kupinda mumakwishu akaoma aya, izvo zvichataridza kusimba kana kusasimba kwacho mumutambo uyu.
Zimbabwe yakasvika kuSouth Africa ichinyatsoziva kuti mazuva anotevera acharatidza gwara riri kutorwa nechikwata ichi maringe nekutamba mitambo yepasi rose panguva iyo chichangobva kuvandudzwa.
Murairidzi mukuru wemaMighty Warriors, Sithethelelwe “Kwinji 15” Sibanda, akasanganisa vatambi vagara vachitamba pamwe chete nevechidiki apo ari kuzama kuvaka chikwata chaane chivimbo nacho kuti chinokwanisa kubudirira mumutambo weWomen’s Africa Cup of Nations uye kupinda mumaOlympics mukati memakore matatu ari kutevera.
Makwishu aya anomupa mukana wekuona mamiriro chaiwo akaita chikwata chake kubva paakatanga kuchivaka gore rapera.
“Tiri kutarisira kuumba chirongwa chakasimba, chinoita kuti tikwanise kuenderera mberi uye ndicho chikonzero takaunza vatambi vechidiki muna Zvita gore rapera,” anodaro Sibanda.
“Makwishu aya achaita kuti tione patimire chaipo, budiriro yavepo uye basa rinoda kuitwa kuitira kuti tigare takagadzirira.
“Ndinofara kuti takasvika zvakanaka. Takapa vasikana mukana wokuti vambozorore uye nhasi (Chitatu) tichaita gadziriro dzedu kuitira mangwana.”
Zimbabwe iri muGroup B, umo ichatanga kutatsurana neEswatini, mumutambo unogona kunge wakaoma.
Mushure memutambo uyu, maMighty Warriors achabandana neZambia neBotswana, izvo zvichapa Sibanda mukana wekuona pamire chikwata chenyika ichi sezvo zvikwata zviviri izvi zviri nyanzvi mumutambo uyu.
Kuti chikwata chenyika ichi chisvike kumasemifainari, chinotofanirwa kutosunga dzisimbe mumitambo yose iri mitatu.
Asi uyu unogona kuve mutoro mukuru sezvo chikwata ichi chichangobva kuvakwa patsva.
Mushure mekuburitswa kwemaMighty Warriors pamatanho emagroup mumakwishu aya akadarika, Sibanda anoda kuona vatambi vake vachirwa semvumba uye kuve nechidokwadokwa chekukunda mumutambo uyu.
“Kusvika pari zvino zvinhu zviri kufamba zvakanaka uye gadziriro dzedu dzange dzakasimba. Semurairidzi, ndiri kuona shanduko yavepo, izvo zvinotaridza kuti tiri kuvaka chikwata chakasimba,” anodaro.
