admin
Mehleli Dube
WONKE umzali ozeleyo ulangazelela ukuthi indodakazi yakhe itshade ibe yisibonelo kwabosendo ngitsho lakubangane bayo. Phela ngelanga lomtshado kuyajatshulwa, kuhlatshwe, kuminzwe kunathwe basuthe abantu baze batshaye amangqetshane. Amantombazana engikhule lawo ehlukile kulawamanje. Ngiyake ngizwe ubuhlungu nxa ngibona abantwana abangamankazana bedlaliswa ngokungamaxhegu okungasela ngitsho lamsobho, kuthembe yona imali. Ngiyazi imali iyafuneka njalo iyinxenye yokuphila kwethu thina abantu, kodwa ungayithanda wedlulise amalawulo uzacina usuwele esizibeni esilengwenya.
Ngiyangimangale ufice iklwinti lentombi lihohobisana lomdodovu wekhehla esekhiphe uphiko emoteni icala engaliboni umntanomuntu. Ngamaxhegu axhwalileyo akuchithela isikhathi kwesinye isikhathi akuthelele legcikwane lengculazi lona elingelaphekiyo, lona liyabe lingagqize qhakala ngoba seladlala ubutsha balo njalo kanengi liyabe selizele. Izibulo lalo liyabe lilidala lakuwe, wena ntombi oyabe ulokho uthengelwa ophitsa labo soseji into ezingabambi thumbu.
Ngikhumbula omunye untombazana owayejola lexhegu elalimbhadalela indleko zekolitshi ayekulo, kwathi sekumele ayefundela umsebenzi kwenye inkampani, njengoba lawe ubazi ubukhwele bamaxhegu, lalingamvumeli ukuthi akhulume lentanga yakhe ngitsho lalabo afunda labo. Phela ezifundweni zemakolitshini kanengi kuyancediswana kodwa ikhehla leNkosi lalingawubambi umtshina. Lithi lingambona untombazana ekhuluma labanye limthele imvubu limbhaxabule licabanga ukuthi osowabo sebelithathele. Into engifuna ubeyazi ntombazana yikuthi ixhegu alikuthandi likumotshela isikhathi njalo liyakugugisa. Elakhe igazi selahloba, uyabe enqumisa igazi lakho alithundubeze. Lengqondo zakho ziphanga ziguge ngoba liyabe licabanga izinto ezitshiyeneyo, lelikuthandayo, imvama kuyatshiyana, ake sithi lifuna ukulalela umculo, lona lizakutshela ngezadla ubhedu oMahlathini wena ngapha ufuna ukulalela iZimdance Hall. Ucina ulandela okufunwa yilo ngoba lona libusa esikhwameni. Ngithi kuwe ntombazana funda, okuyimbijana okuphiwa ngabazali bakho ungakusoli uzathi nxa usufundile usungumaqhuzu kwezinye indawo ubusuthenga noma yini oyifunayo. Ungaziphatha kuhle uzihloniphe uzabona lawe usuzitholela ijaha elingusowenu, ozasungula lalo phansi libe lembali yenu enhle.
Kambe wena kungakuthokozisa ukuzwa kuthiwa nguye lo untombazana ongayiwayo emaxhegwini. Ngiyangizwe abanye ontanga bethi amaxhegu ayagcina, kodwa noma egcina, alobukhwele obuzakucakisa uthole usulucingo, angani ngumphunzo womdlwane wehotshi zikaNdatshi eziphiwa amajodo ebusika ngoba engela mali yokuthenga ukudla kwazo okuqondileyo. Wena ojola lexhegu ngithi hlukana lalo manje, udinge osowenu.
Ayixabene
Mehleli Dube 0772673682
Online Reporter