admin
Timomuda Chakanyuka —
VARAIRIDZI vatsva 2 300 vaitarisirwa kutanga kushanda pakavhurwa zvikoro nemusi weChipiri svondo rino mushure mekunge vapinzwa mabasa neHurumende.
Munyori mubazi rezvedzidzo yepuraimari nesekondari, Dr Sylvia Utete-Masango vanoti mukana uyu uri kupihwa kuvarairidzi vasina mabasa asi vane zvitupa zvekudzidzisa pakati pemakore a2013 na2015.
Dr Utete-Masango vanoti varairidzi vakapinzwa basa vanokwanisa kuenda kumahofisi ezvedzidzo kuti vanoziviswa nezvematunhu avachanoshandira.
Vanoti pavarairidzi 2 300 ava, 1 300 vachange vachifundisa vechidiki padanho reEarly Childhood Development (ECD) A, 500 kupuraimari nevamwe 500 vekusekondari.
“Tine magwaro ane huwandu hwevarairidzi vanoda mabasa avo vane magwaro ekudzidzisa mumatunhu akasiyana. Magwaro iwayo ndiwo atinoshandisa mukuvapinza mabasa,” vanodaro.
Bazi rezvedzidzo yepuraimari nesekondari rakapihwa mvumo yekupinza varairidzi mabasa neveCivil Service Commision (CSC).
Gore rapera, bazi iri rakakumbira kuti ritenderwe kupinza basa varairidzi 7 000 senzira yekuzadzikisa zvirongwa zvegwaro idzva redzidzo, reNew Curriculum.
Masangano anomiririra varairidzi agara achinyunyuta zvichitevera kushomeka kwevadzidzisi muzvikoro achiti izvi zvinoderedza budiriro yedzidzo. — Sunday News.
Online Reporter