Online Reporter
Kingstone Mapupu
MAPURISA eZimbabwe Republic Police (ZRP) kuMasvingo vakasunga Elliot Hwende (19) naPromise Njanjure (52), vose vekuTriangle kuChiredzi, nemhosva yekuba mombe 28 idzo dzose dzakazowanikwa.
Hwende anogara kuVillage 1 Crown Range uye Njanjure achigara paPlot 35 Mungwezi kuChiredzi.
Mombe idzi vanonzi vakadziba kuVillage 1 Basi kuTriangle.
Mutauriri wemapurisa kudunhu reMasvingo, Inspector Kudakwashe Dhewa, vanoti nemusi wa30 Zvita gore rakapera nenguva dza6am, Nerverson Moyo (62) wekuVillage 1 kuBasi kuTriangle, akafumoona kuti mombe dzake gumi dzaaiva apfigira mudanga zuva radarika dzakanga dzisimo dzabiwa.
Vanoti nemusi wa3 Ndira gore rino, mapurisa vakazowana runyerekupe rwekuti kwaiva nemombe shanu dzaiva dzakachengetwa kumba kwaOnisimo Chibwe kuVillage 1 kuWasara Wasara kudunhu raMambo Neromwe kuChiredzi.
“Mapurisa vakabva vamhanya kunofeya nyaya iyi, ndokubvunzurudza Onisimo Chibwe akabva ataura kuti mombe idzi aiva adzipihwa naElliot Hwende kuti adzichengetedze. Zuva raitevera, Elliot Hwende akabva asungwa nemapurisa akabvawo ataura kuti vaishanda pamwechete naPromise Njanjure mukuba mombe,” vanodaro Insp Dhewa.
Vanoti mapurisa vakabva vaendawo kumba kwaNjanjure uko vakasvikowana mombe makumi maviri nenhatu dzakavharirwa mudanga rake.
“Mukubvunzurudzwa nemapurisa, Promise Njanjure akatadza kupa umbowo hunonzwika kuti mombe idzi aiva akadziwana kupi. Pakucherechedza mombe idzi, Nerverson Moyo akakwanisa kuziva mombe dzake nhanhatu uyewo Joseph Mpofu wekuVillage 6B kuManyoroka kuTriangle
akakwanisawo kuziva mombe dzake nhatu mukati megumi idzi,” vanodaro Insp Dhewa. Vanoti mombe dzaiva dzabiwa dzaikwana 28 dzose dzakawanikwa nemapurisa pakasungwa nhubu idzi.
“Semapurisa, tinorumbidza zvikuru veruzhinji nekupa mashoko akakosha zvakaita kuti mombe dzaiva dzabiwa idzi dziwanikwe uyewo nekusungwa kwemakororo aya. Mapurisa vanoramba vakateya nzeve munyaya dzekurwisana nekubiwa kwemombe nezvimwe zvipfuyo, nekuparwa
kwedzimwe mhosva dzakatsaukana mudunhu rose reMasvingo,” vanodaro Insp Dhewa.
Vanokurudzira vanhu vose vakashaya mombe dzavo kunharaunda yeTriangle kuti vaende pamapurisa ari padyo navo vonobatsirwa.
