Online Reporter
Kingstone Mapupu
MURUME ane makore 37 okuberekwa, Danisa Ncube, akasungwa mushure mekuwanikwa aine midzatsa 16 yembanje iyo yaive mubhegi rake.
Mutauriri wemapurisa kudunhu reMidlands, Inspector Emmanuel Mahoko, vanoti murume uyu akasungwa nguva pfupi yadarika ari pachiteshi chemabhazi cheKudzanayi Bus Terminus kuGweru.
“Matikitivha echikamu cheCriminal Investigations Department (CID) eDrug and Narcotics ekudunhu reMidlands, mushure mekunyeverwa nevamwewo vanhu, vakasvikira murume uyu, Danisa Ncube, wekuSection 3 kuMtapa kuGweru achangogashidzwa mbanje iyi ndokubva vamusunga,” vanodaro Insp Mahoko.
Vanoti Ncube akasechwa akawanikwa aine mbanje midzatsa inokwana 16 yaiva yakaiswa munzvimbo dzakasiyana mubhegi rake
Akatomiswa mudare nemhosva yekuwanikwa aine mbanje nguva pfupi yadarika uye nyaya yake ndokudarikidzwa mberi.
Mbanje yakawanikwa iine musungwa uyu yakachengetedzwa nemapurisa uye ichashandiswa seumbowo mudare.
“Tinoyambira veruzhinji kuti vasiyane nekutengesa zvinodhaka zvisingabvumidzwe pamutemo uyewo tinokurudzira vanhu kuti vamhan’are kumapurisa vakaona vose vanotengesa zvinodhaka,” vanodaro Insp Mahoko.
Vanoti ibasa remunhu wose kurwisa nyaya dzekutorwa nekushandiswa kwezvinodhaka munyika.
