Online Reporter
Thupeyo Muleya
MURUME ane makore 42 okuberekwa akatongerwa kugara mujeri kwemakore maviri nechidimbu mushure mekuwanikwa aine mbanje inorema 80 kgs iyo yaive mubhazi kuBeitbridge.
Kusungwa uku chikamu chechirongwa cheHurumende chekurwisa kupinzwa kwezvinodhaka nezvimwe zvisiri pamutemo pakati peZimbabwe neSouth Africa.
Phenias Tichivangama wekuKhwalu 2 kuBeitbridge, uyo anofungidzirwa kuti mumwe wechikwata chevanhu vanotengesa zvinodhaka munyika yose, akasungwa nomusi wa6 Zvita gore rapfuura pachiteshi cheDulivhadzimu kuBeitbridge apo aitora “pasuru” yake.
Akabatwa nemhosva yekuwanikwa nezvinodhaka paakamiswa pamberi pemutongi wedare reBeitbridge Magistrates Court, Mai Charity Maphosa, nemusi weChitatu.
Tichivangama akapihwa chirango chekugara mujeri kwemakore mashanu apo makore maviri nechidimbu akasendekwa parutivi nechitsidzo chekuti haafanire kupara mhosva yerudzi urwu mukati memakore mashanu.
Muchuchisi, VaWill Brought Muleya, vakaudza dare kuti nomusi wa6 Zvita gore rapfuura, mapurisa akanyeverwa kuti musungwa uyu aive nembanje yaive mubhazi raienda kuDulivhadzimu.
Matikitivha akabva aenda ndokunogara pachiteshi ichi apo vakazoona Tichivangama achitora masaga aifungidzirwa kuti aive nezvinodhaka.
Mapurisa akabva amubata ndokusecha mukwende wake, izvo zvakazoita kuti pawanikwe midzatsa mihombe yembanje 22 nemimwe midiki 26 iyo yairema makgs 79,1 yakavigwa pasi pemagumbeze.
Tichivangama akabva asungwa.
