Online Reporter
Muchaneta Chimuka
MURUME aishanda paBully 25 Mine, kuKwekwe anonzi akapondwa nemuridzi wemugodhi wezvicherwa uyu achibatsirana nevashandi vake vaviri vachimupomera kuti aive aba goridhe rinorema 2.8g.
Mutauriri wemapurisa mudunhu reMidlands, Inspector Emmanuel Mahoko, vanotsinhira nezvekufa nenzira yekupondwa kwaLennon Obert Manguza (46) wekuMsasa, kuKwekwe uyo aive mushandi wepamugodhi uyu.
“Tine nyaya yemurume ane makore 46 anonzi akapondwa nevarume vatatu vanoti Obedience Maponga (28), Emmanuel Kazika (23) naAustin Maisva (35) avo vatova mumaoko emapurisa. Mangudza anonzi akarohwa muviri wese nevasungwa vatatu ava vachimupomera kuti ainge aba goridhe ravo rinorema 2.8g. Nyaya iyi yakaitika svondo rapera paBully 25 Mine kuKwekwe,” vanodaro.
Vanoti Maponga naKazika vaishanda sevarindi vekambani iyi uye vakanga vari pabasa panguva iyo vakapara mhosva iyi apowo Maisva ndiye muridzi wemugodhi wezvicherwa uyu.
“Zvinonzi pazuva iri, kuma1800 hours, vashandi vanorinda mugodhi ava vakanga vari pabasa apo vakaona kuti goridhe rakagadzirwa iro rinorema 2.8g rakanga risisipo vachibva vatanga kupomera Magudza kuti ndiye ainge ariba. Vakamusunga ndokuenda naye kuhofisi yavo uko vakanoita zvijana zvekumurova muviri wese neshamu. Vakazoenda naye kune imwe imba yemapuranga (cabin room) uko mumwe mushandi wepamuzinda uyu akamuwana akaradzikwa pasi atofa nechekare kuma2300 hours,” vanodaro.
Mapurisa akazoziviswa nezvenyaya iyi apo vatatu ava vakabva vasungwa.
“Tinokurudzira veruzhinji kuti vasiyane nenyaya dzekurova vamwe nekuti imhosva huru kunyangwe paine fungidziro yekuti munhu iyeye anenge apara mhosva. Mutemo unotaura kuti munofanira kuendesa musungwa mumaoko emapurisa kuti nyaya yacho ifambiswe zvakanaka maringe nemutemo,” vanodaro.
