adminJohas Moyo
ABABONA ngempilakahle yezifuyo abeVeterinary Services koBulawayo sebekhuthaze abafuye izifuyo ezitshiyeneyo ukuthi bavikele izifuyo zabo ukuze zingaphunzi ukuze izibaya zabo zikhule njalo kuqheliswe lesibaya sesizwe.
UDokotela wezifuyo uNdabezinhle Mkhwananzi uxwayise abalimi ukuthi banakekele izifuyo zabo ngokuzipha imithi ezakwenza zingaphunzi.
“Ukuphunza yinto embi kakhulu ezifuyweni ngoba zingavele ziqalise ukukwenza zihlala njalonje ziphunza.
“Kwesinye isikhathi inkomokazi ithi isimithi iphunze kungakedluli amaviki amangaki isanda kuxotshwa,” kutsho uDkt Mkhwananzi.
UDkt Mkhwananzi uqhubekele phambili esithi okubangela ukuthi izifuyo ziphunze ligcikwane elibizwa ngokuthi yi-vibrio foetus okuligcikwane elimemetheka lula ezifuyweni njalo lilakho ukuhlasela inkunzi kanye lenkomokazi.
“Umlimi uyenelisa ukunanzelela ukuthi izifuyo zakhe sezihlaselwe ligcikwane leli ngezibonakaliso ezigoqela ukungamithi kwenkomo okwesithathi esithile laloba ixotshwa.
“Kwesinye isikhathi ingaxotshwa iyaphunza sonke isikhathi.
Kukanti kwezinye isikhathi inkomo ilakho ukuxotshwa okwamalanga edlula angu-21 ayiwo akhangelelweyo ixotshwe okwamalanga aphakathi kwangu-10 kusiya ku-60.
“Lokho kubangelwa yikuthi inkomo ingamitha kodwa kwehlule ukuthi kube yinkonyane okwenza ifune ukuxotshwa futhi.
Ikanti inkunzi zona kazila sibonakaliso ngoba kukhanya kumathokazi lenkomokazi kuphela,” kutsho uDkt Mkhwananzi.
Uthe umlimi angabona izibonakaliso lezi kumele ahambise inkomo zakhe kubodokotela ziyehlolwa ukuthi kungabe kubangelwa zinkunzi kumbe ngezinsikazi.
Uphethe ngokuxwayisa abalimi ukuthi belaphise inkomo zabo nxa zithe zabanjwa ligcikwane leli kumbe nxa becabangela ukuthi zihlaselwe yilowo mkhuhlane.
Uthe inkomo zilakho ukwelatshwa ngokuthi zekelwe zidlule isikhathi okumele zixotshwe ngaso zingaphiwanga inkunzi okwesikhathi esithile.
“Inkomo kumele zihlatshwe amajekiseni ukuze zivikelwe emikhuhlaneni kabili kuseqiswa inyanga eyodwa ngaphambi kokuba zizale kusetshenziswa i-vibro vaccine,” kuphetha uDkt Mkhwananzi.
Online Reporter