adminMuhamed Komboni
MURUME wekwaMutare akamiswa mudare achipomerwa mhosva yekuba migomo mina yemakerotsi pane rimwe purazi reko.
Munyaradzi Mabvengwa anobvuma mhosva iyi paanomiswa pamberi pemutongi Purity Gumbo wedare reMutare Magistrates Court.
Muchuchisi Aaron Nyamasoka anoudza dare kuti nemusi wa6 Kukadzi gore rino, Mabvengwa akaenda papurazi raChigodora ndokunoba migomo mina yemakerotsi. Mabvengwa akazobatwa ndokuendeswa kumapurisa.
Achipawo divi rake mudare, Mabvengwa anoti akapara mhosva iyi sezvo achitsvaga kurarama.
“Ichokwadi ndini ndakaba makerotsi, ndaidawo kurarama sezvo upenyu hwakandiomera. Ndakaba migomo mina izvo zvakazoita kuti ndibatwe.
“Chinangwa changu chaiva chekuti ndizotengesa makerotsi aya kuti ndigowanawo chouviri. Mambo wangu, handisi kuramba mhosva iyi, ndini ndakaita izvi,” anodaro Mabvengwa.
Mutongi Gumbo akayambira Mabvengwa kuti asiyane netsika yekuita ruoko rurefu sezvo zvichizomupinza panguva yakaoma.
Nyaya iyi iri kuenderera mberi nekutongwa.
Online Reporter