“Ngake ngangqikila unompembe ngo 1979”

Lovemore Dube

OWAKE waba ngumdlali wenguqu kuleli uGibson Homela usephumele egcekeni ngesehlakalo sokutshaya unompembe uPaul Williams ngo-1979.
UHomela wayedume ngokuba lolaka ngezikhathi esadlala.

Ukhulume ngesehlakalo lesi ngeSonto, kumkhosi wokuthakazelela ilanga lakhe lokuzalwa, efikisa iminyaka engu-79 yokuzalwa. Uthe esadlalela iZimbabwe Saints watshaya unompembe uWilliams eRufaro Stadium.
Lo kwakungumdlalo we-final yenkezo yeChibuku leCAPS United. Umdlalo lo wacina sekuyi 5-2, kunqobe iCAPS United, umdlalo usuqediselwa eBarbourfields.

“Phakathi komdlalo kwaba lokuxabana komunye wethu uMax Tshuma loTobias Moyo oweCAPS United. Unompembe wajaha wanika uMax ikhasi elibomvu. Akungiphathanga kuhle.
“Njengokaputeni, ngafika kunompembe ngambuza ukuthi kungani engamnikanga ikhasi elilithanga. Wahle wangikhiphela ikhasi elibomvu. Ngamtshaya ngengqindi. Wabaleka, ngamgijimisa. Lami emuva ngigijinyiswa lipholisa,” kutsho uHomela.

Uthe wakhululwa ngu-seargent.
“Ngahamba ngayahlala lababukeli.”

Kulandela lokhu, uHomela wahle waxotshwa emdlalweni okwempilo yakhe yonke. Waxolelwa ngomnyaka owalandelayo, lapho ilizwe liphendukiswa kuFifa.
Phambi kwalumdlalo, uHomela wake waveza ulaka lwakhe etshaya indoda okubikwa yayithwala umuthi.

Kubikwa indoda le yathunywa ukuthi ingene enkundleni kuqala, lapho bedlala leMangula (Mhangura), eRufaro.