Online Reporter
YiNtatheli kaMthunywa
ISIGELEKEQE ebesesibangele ukungahlaliseki esabelweni seMasvingo uTafadzwa Janyire Zimirenyika (29), ubotshwe ngamapholisa esolwa ngamacala angu-203 ahlanganisela ukugqekeza, ukutshontsha impahla ezehlukeneyo, ukudlwengula abesifazana kunye lokubulala.
U-Inspector Kudakwashe Dhewa oyisikhulumi samapholisa eMasvingo uthe indoda le ibotshwe ensukwini ezisanda kwedlula ngemva kokuba amapholisa ethole udletshana ngamacala awenzayo.
“Silendoda ebizwa ngokuthi Tafadzwa Janyure Zimirenyika (29) ubotshwe ngamapholisa akoNgundu ngamacala ehlukeneyo agoqela ukugqekeza, ukutshontsha, ukudlwengula lokubulala.
Kubikwa wadala amacala la endaweni ezehlukeneyo eMasvingo kusukela ngomnyaka ka-2023 kuzofika lonyaka. Amapholisa eqhubeka ngokuchwayisisa ngamacala endoda le asengu-203 wonke. Amacala ayo agoqela ukutshontsha, ukugqekeza, ukudlwengula, ukubulala, ukutshontsha izimota, ukubulala impahla kunye lokunye okwehlukeneyo.
Amacala la kubikwa ukuthi adalwa endaweni ezibalisa eMwenezi, Ngundu, Renco, Muchakata leZaka.
“Kucala lokubulala uTafadzwa, wabulala uJacob Museva amhlahlela ngehloka mhlaka 6 Nhlangula lonyaka esola ukuthi umufi wayezame ukusiza enye indoda ayefuna ukuyitshontshela eLundi, eMwenezi,” kutsho uInsp Dhewa.
Umsolwa useke wamiswa emthethwandaba okokuqala, wabuye wabiselwa ejele lapho okuvunjululwe khona amanye amacala akhe.
“Sibonga umphakathi ngokuqhubeka usincedisa njengamapholisa ukuze senelise ukubopha izigelekeqe esezihluphile emphakathini. Ngenxa yokwanda kwamacala okudlwengula kwabesifazana kunye lokubulala, sikhuthaza umphakathi ukuthi ubikele amapholisa ngabantu abababona behamba hamba ezigabeni zabo kungacaci abakwenzayo,” kutsho uInsp Dhewa.
