admin
IHLANDLA lesine lokuhlasela kweCovid-19 kulindeleke ukuthi lingabi libi kakhulu.
UDokotela Groom Michille wesikhungo esicubungula izifo ezithelelwanayo, iNational Institute for Communicable Disease (NICD), uthe okwamanje ihlandla lesine akukhangelelwanga ukuthi libe libi kakhulu ngoba alikabi khona igcikwane elitsha eselikhona.
Uthe ihlandla lesine lokuhlasela kwaleli gcikwane kulindeleke ukuthi lifike kweleSouth Africa kunyanga kaMpalakazi.
“Asikwazi ukuqinisekisa ukuthi leli hlandla lizafika nini ngoba kuzakuba lokhetho lwabohulumende basekhaya okutsho ukuthi kuzakuba labantu abanengi abazakube behlangana okungabangela ukuthi babe banengi abantu abathelelanayo okungenza ukuthi ihlandla lesine liphangise ukufika,” kutsho yena.
Uthe okwakhathesi into engasiza yikuthi abantu bahlatshwe amajekiseni okuvikela iCovid-19 ngobunengi babo ngoba ukuthi abantu badedelwe balithole leli gcikwane ukuze imizimba yabo izenzele ngokwayo amasotsha okulwa lalo, yinto engathatha isikhathi eside futhi eyingozi ngoba uma kugula abantu abanengi ngesikhathi esisodwa kuzasilela izibhedlela.
“Kusekude ukuthi kuyekelwe ukugqoka izayeke leminye imithetho elandelwayo yokuzama ukunqanda ukusabalala kakhulu kwaleli gcikwane. Okutsho ukuthi kukhona izinto ebesijwayele ukuzenza ngaphambi kokuthi kufike lesi sifo esisekude ukuzenza,” kutsho uDkt Michelle.
Online Reporter