admin
Izikhathi ezinengi kwandise ukubana sehlelwe zingozi ezifana lokutshaywa yizigebengu, ukuntshontshelwa , ukunethwa lizulu, ukudlelwa incwadi eziqakathekileyo ngumuhlwa, ukutshelwa zimpahla kanye lokunye okunengi. Izikhathi ezinengi kusuka kube buhlungu ngoba ucina usulahlekelwe yimpahla eqakathekileyo efana lezinncwadi , imali kanye leyinye impahla jikele.
Ekulahlekeni kwezincwadi inengi labantu alikwazi ukubana kwenziwani nxa usuthe walahla incwadi yokuzalwa, isithupha kanye lepasipoti. Abadala bandise ukuqinisa isaga esithi “ukungazi kufana lokufa” ngoba benanzelela ukubana inengi labantu lihlala emnyameni ngoba bengazi ukuthi kulokukhanya njalo abanye kabazihluphi ngokubana badingisise lalapho abangathola khona ukukhanya .Kuqakathekile ukubana abantu bahlale bekwazi ukubana kwenziwana nxa sengithe ngalahla incwadi zami ezingipha ilungelo lokwaziwa.
Kule iviki ngithole ithuba lokuxoxisana labantu abanengi abalahlekelwa zincwadi zokuzalwa kanye lezithupha kodwa ke bengazi ukubana uqala kuphi ukuze athole izincwadi zakhe. okokuqala sizaxoxisana ngokubana lapho uthe walahla incwadi yokuzalwa kufunekani.
Ukuze uyithole incwadi yakho yokuzalwa entsha kufuneka ube ukwazi ibirth entry number yikho ukuze bakubhadalise imali engange $5 ukuze bakwenzele entsha, njalo usungayenzisa loba kuwaphi amawofisi aseZimbabwe.Uma ungelayo ibirth entry number sokemele usebenzise inombolo zesithupha sabazali bakho kodwa ke ubhadala imali engange $10 (search fees), kodwa-ke uyithatha emawofisini lapho owawuvele wathathela khona ekuqaleni. Kumele sinanzelele ukubana nxa incwadi yokuzalwa isithe yalahleka kawuqali katsha kodwa uyabhadala imali yokubanaa bakwenzele eyinye kuphela.
Lapho uthe walahla isithupha kumele uqale ngokuya emapholiseni uyebazisa ukubana ulahlekelwe yisithupha.
Emva kwalokhu uzabhala I-affidavit uchaza ukubana kuhambe njani kuze kucine sekulahleka isithupha.Incwadi le oyenza emapholiseni kumele ifakwe isidindo ngamapholisa.Emva kwalokhu sungaqonda ke komsiteli uthwele imali engange $10 ozayibhadala ukuze bakuthathise esinye isithupha.
Emva kwalokhu impilo yakho sibuyela nje ifana ngoba izincwadi zamalungelo akho okwaziwa uyabe usulazo. Iloba ungaze ulahle ipasipoti lakho ke uqala ngokuya bika emapholiseni bakubhalele incwadi ubusuqonda ke emawofisini akhona uthwelenimali engange $53 ukuze uyathatha kakutsha.
Kuqaqkathekile ukubana abntu bahlale besazi ukubana lapho sebethe balahlekelwa zincwadi zabo babekwazi ukubana kwenziwani ukuze ucine uthole izincwadi zakho kakutsha.
Kasihlanganeni njalo kuviki elizayo.
Umlobi utholakala kukheli ethi [email protected] loba kunombolo ezithi 0773 195 055.
Online Reporter