admin
Sizwe saMantungwa njengoba lisazi ukuthi iphephandaba likazulu kalideli ngokuliphathela indaba ezimnandi kwezokuzithokozisa, lamhlanje lakho lize sizalijabulisa njengansukuzonke. Lamhlanje siliphathele itshatshazi lentombi elenza izimanga ku-disco music. Kayiculi nje lintombi ingilosi yezulwini ingumfana.
Umculi lo ongena kujabule ngitsho lombankwa emdulini nguGetrude Sibanda owaziwa ngokuthi nguGettie Diamond nxa sesenza adume ngakho. Othanda ukuhlala ejabulile nansi ingxoxo phakathi kwentatheli yephephendaba likazulu uCornelius Luphahla (CL) lengilosi le, uGetrude Sibanda (GS).
CL: Akuthi fahlafahla ngilosi yezulu mayelana lembali yakho kanye lomculo wakho.
GS: Mina ngazalwa mhlaka 6 Ncwabakazi ngomyaka ka1999 eNsiza Hospital esigabeni seDolo eFilabusi. Kwathi ngo2005 ngayangena ugiredi 1 eShumagange Primary School ngo2012 ngayafunda ufomu 1 eMandava High School eZvishavane. Ngasuka njalo ngo2013 ngayafunda ufomu 2 eChizungu High School eMberengwa.
Ngomnyaka ka2013 yikho engayafunda khona kweleSouth Africa ngaqhubeka ngezifundo zami esikolweni seMayibuye Secondary School khathesi ngiku giredi 12.
Ezokucula ngaziqala kumnyaka ophelileyo ngo2015 noma nje ngangivele ngikuthanda ukucula ngoba ngangithanda ukulalela umculo kaSlizer besengizama lami ukucula. Ngake ngancedisa iqembu le Okavango likhupha idlalade lalo ngo 2015. Ngike ngahlabela njalo ku-launch yedlalade lomculi uMehlokazulu ngilamaqembu agoqela iZhwane Finest, Abafana bakaMzilikazi, kanye loBongani Ncube.
CL: Njengomculi akutsho ntombenhle ukuthi sowakhipha amadlalade amangaki lokhe waqala ukucula?
GS: Okwakhathesi njengoba ngisanda kuqala ukucula sengikhiphe idlalade elilodwa engilikhiphe ngo2015 ekupheleni komnyaka elithi Ziqhenye. Ingoma ezikulelidlalade ngazibhalela njalo ngazihlabela ngingedwa noma nje kulabanye abangigidelayo emculweni wami.
CL: Tshela umphakathi ukuthi wandise ukuculela ngaphi umculo wakho ntombi yakoVodloza njalo ngaphandle kokucula msebenzi bani owenzayo?
GS: Mina umculo wami njengomculi osasungula ngandise ukuwutshayela emidlalweni, emitshadweni kanye lanxa kulemikhosi yabaculi. Lokhu ngikwenza kweleSouth Africa ngakho khathesi ngikhangelele ukubuya kwelakithi eZimbabwe ngiyetshayela khona ingoma zami. Ngakho okwakhathesi ngisafunda angikaqali ukusebenza njalo ngisasengaphansi kwezandla zabazali.
CL: Umphakathi uthanda ukwazi ukuthi njengomculi abantu bathini ngomculo wakho?
GS: Noma nje ngisacathula kwezomculo abantu bayajabula kakhulu nxa ngitshaya ingoma zami njalo bangikhuthaza ukuthi ngiqhubekele phambili noma kulukhuni. Yikho nje ngihlala ngibizwa ngabantu nxa belemidlalo ethile ngoba besazi ukuthi ngizabajabulisa besale bekhululekile.
CL: Njengomculi osacathula njalo osasemncane ngeminyaka, bunzima bani oyake uhlangane labo njalo nkuthazo bani oyipha abaculi abasacathulayo.
GS: Mina njengomculi osacathulayo ngihlangana lobunzima obukhulu kakhulu ngoba ekuculeni kudingeka imali yokukhipha umculo ngokusemthethweni ngakho kunzima ukuthi ngithole imali yalokhu njengoba ngingasebenzi.
Ngalokhu ke kangizange ngadela ngaqhubeka ngizama ngaze ngalikhipha idlalade lami.
Ngakho ke kubaculi abasacathulayo njengami ngithi kababambelele ekuculeni bathembele enkosini uNkulunkulu noma kunzima bazi ukuthi uzabancedisa kukho konke abakwenzayo baze baphumelele.
Online Reporter