Online Reporter
Fungai Muderere
AKUTHAMBANGA, kusinda kuyitshe ukuba ngumqeqetshi weSimba Bhora uJoel Luphahla.
Ubika ukuba uphakathi kwenkinga edinga ukuxazululwa masinyane ngoba umthwalo alawo kuleliqembu mkhulu.
ULuphahla, odume ngelithi “Dubai” enkundleni zenguqu, ungene kulumsebenzi evela kuba ngumsekeli kamqeqetshi kuqembu leDynamos lakuHighlanders.
Usetshengisele ukuthi ulesiphiwo sokuphakamisa amaqembu nanko wenelisa ukukhuza iTelOne yaze yangena kuligi ephakemeyo eyePremier Soccer League okwakuqala. Wazama lokufikisa iqembu le-Eagles elidlala emhlubulweni we-Northern Region.
Esikhundleni sakhe kuSimba Bhora, uLuphahla ubike ukuthi akuthambanga.
“Lokhu ngokokuqala ngingumqeqetshi omkhulu. Umdlalo wenguqu uletha umthwalo omkhulu. Akulula ukuba ngumqeqetshi. Ngiyindoda elemuli, lokhe ngizama ukuthi ngihlanganise lokhu lomsebenzi wami. Ngilethemba lokuthi konke kuzahamba kuhle,” kutsho uLuphahla, ekhuluma leZimpapers Sports Hub.
Umqeqetshi lo uphethe okunengi esandleni nanko usanda kuthola isithupha se-Caf B Licence. Kulokhu, usetshengise ukuba ibhola uyalazi, akaliphumputhi.
“Ngijabule kakhulu ngalimpumelelo. Bekungelula, ngivuka ebusuku ngibala ingwalo. Ngiqinisele ngabambelela. Khathesi sekumele ngithole isithupha se-Caf A,” kutsho uLuphahla ngokujabula.
Ukuqansa kwalumqeqetshi kuza ngesikhathi iqembu leSimba Bhora lifuna umuntu okhaliphileyo ozalikhokhela ukuthi liphinde lithwale inkezo yeCastle Lager. Iqembu leli yilo elaba yintshantshu yeligi ephakemeyo ngesizini ka2024.
Indoda le, edabuka eTsholotsho esabelweni seMatabeleland North, itshengise ukuthi isasiphethe istayila.
“Konke kudinga isineke kunye lokubambisana. Ngicabanga ukuthi njengeqembu sizathuthuka kakuhle,” kutsho uLuphahla.
Ngemva kokuqala ngegiya eliphansi kumkhankaso weligi yeCastle Lager, iqembu likaLuphahla lenze ngcono kumaviki asanda kwedlula, okutshengisa intuthuko.
Kodwa uLuphahla uthe kunengi okumele bakwenze.
