Online Reporter
Ethel Ncube
UMHLABELELI, umahlekisa njalo engumlingisi olodumo uMadlela Sikhobokhobo ogama lakhe lokuzalwa enguMothusi Bashimane Ndlovu usebuye wazakhela udumo nanko usebonakala kumabonakude weSABC 1 eMzansi Afrika.
UMadlela owazakhela udumo ngengoma yakhe ethi: Ngamnanka, usethole inhlonipho futhi ekubeni ngumphathi womkhosi (MC), umlingisi, umhlabeleli, lomahlekisa osekwenze waba labalandeli abanengi kuleli njalo kukhanya usezaziwa ngamandla langaphandle kwelizwe
UMadlela ulingisa engu-mphenyi (detective) kumdlalo othi Boarding School ophuma kumabonakude we-SABC.Ekhuluma lentatheli uMadlela uveze injabulo enkulu ngokulingisa kumdlalo lo athi kuzamvulela amathuba.
“Ngijabule ngimanzi te ngilapha, ngabizwa kuma-auditions eSouth Africa ngomunye undoda oyinzalo yeSouth Africa ngafika ngenza engidume ngakho ngaphumelela.
“Sengiphumelele yikho ukungena ekulingiseni kumdlalo othi Boarding School ngibizwa ngokuthi Detective Mdletshe, angibizwa ngokuthi Madlela kiwo kodwa nginguDetecive Mdletshe,” kubika uMadlela.
Uthe ithuba leli alitholileyo lizamvulela amanye amathuba ngoba banengi ababukela imdlalo yaseMzansi besemazweni ehlukeneyo.
“I-SABC ligama elikhulu emizini eminengi kuleli laseSouth Africa, ngitsho lakwamanye amazwe abantu babukela yona, kungakho ukulingisa kumdlalo okhitshwa lapho kutsho ukuba amathuba amakhulu asezavuleka.
“Ama-phrojusa akwamanye amazwe lawo aselakho ukubona lokho engenelisa ukukwenza basebengibiza ukuthi ngilingise kumidlalo yabo,” kutsho uMadlela.
Ubuye waveza ukuthi umsebenzi wokulingisa awulula.
“Umsebenzi wokulingisa udinga ukubekezela lesikhathi njalo nxa ulingisa abantu bayawunanzelela umsebenzi wakho bawuphakamise.
“Engingakutsho kubalingisi abasacathulayo yikuthi nxa kulubizo lwakho ukulingisa qhubeka uzama kuzaze kulunge ngelinye ilanga. Lingakhohlwa ukuba sengitholakala kuNetflix ku-drama ethi Shaina, asambeni siyeyibukela kuNetflix,” kubika uMadlela.
