Online Reporter
Ethel Ncube
ABALESIPHIWO sokutayila koBulawayo lakundawo eziseduzane sebenxuswe ukuthi baze ngobunengi ukuzoncintisa ukuba nguMr loMiss Khaya Arts.
Iqembu lezokuthokozisa uzulu leli libeke umbiko walumncintiswano, lapho eliveze ukuthi lidinga abantu abazatayila ngoNhlangula.
Umcimbi womncintiswano wokutayila lo uzaqhutshelwa eTshabalala Open Arena lapho okuyindawo okusebenzela khona iqembu leKhaya Arts Arena. Kubikwa labo abazanqoba bazathola imivuzo etshiyeneyo.
Abathola izicoco zakuqala uMr loMiss Khaya Arts bazathola isitofu sokupheka ese-gas letanka, ukuyalala ehoteleni ubusuku obubodwa kunye lezipho ezitshiyeneyo.
Ekhuluma lentatheli, oweKhaya Arts uNanziwe Ngwenya ubike ukuba sebeqalisile uhlelo lokubhalisa abazatayila.
“Ilanga lokubhalisa ukutayila ngoLwesihlanu eTshabalala Open Arena ngehola lesitshiya galolunye ekuseni. Abafuna ukungena emncintiswanweni lo kumele babuye ngoLwesihlanu. Umuntu ngamunye abuye lesithupha sakhe le-US$10 yokubhalisa. Sikhangelele ukuthatha abantu abangu-30,” kutsho uNgwenya.
Uqhubekele phambili ebika ukuba ama-auditions awokuqala enziwa ngeviki edluleyo.
“Ama-auditions awokuqala aqhutshwa kodwa inani esilikhangeleleyo alenelanga, okwenze sedlulisela phambili ilanga lokudinga abatayilayo.
“Siyanxusa intsha yakoBulawayo ukuba ibuye kuma-auditions labasanda kuqeda isikolo sondelani eduze liziwinele imivuzo yenu etshiyeneyo.”
