YiNtatheli kaMthunywa
UKUBHUDLA utshwala ubusuku bonke, ukulwa kanye lokudabuka kwenhliziyo kucine ngokufa kowesifazana oleminyaka engu-34 eDzivaresekwa 2, ngemva kokuba isithandwa sakhe simgwaze wafa.
UTakunda Shawn Agere (23) uvume ukuthi ubulele uLillian Muzhinji (34), ngemva kokuxabana bevela ebhawa ngeSonto ekuseni.
Imbiko iveza ukuthi laba ababili balwa belapho ababenatha khona utshwala, batshayana uLillian wasala elamanxeba, basebebuyela bonke endlini yabo.
Kodwa udlakela lolu lwabuye lwaqhubeka sebesendlini.
UTakunda kubikwa wagwaza uLillian entanyeni nge-screwdriver ngesikhathi bexabana.
Ngemva kokumhlasela, kubikwa ukuthi wamvalela endlini wasuka wahamba.
Ngemva kwamahola athile, uTakunda wazama ukufonela intombi yakhe kumakhalekhukhwini, kodwa kazange aphendulwe.
Kubikwa uthe ebona ucingo lungaphendulwa, wacela umngane wakhe ukuthi ayehlola ukuthi wayenjani. Umngane lo wathi efika wahlangana lembedumehlwana nanko uLillian wayesedlule emhlabeni.
ULillian kuthiwa wayelele embhedeni engagqokanga, umzimba wakhe ugcwele igazi.
Umngane lo wahle wazisa uTakunda ngalokho ayekutholile.
Kulokuthi abaleke, uTakunda kubikwa ukuthi waqonda kumalumakhe wayamtshela ngokwakwenzakele.
Ngemva kwalokho wazinikela emapholiseni njalo khathesi uncedisa ekuphenyweni kodaba lokubulawa kowesifazana lo.
Ukubulawa kukaLillian ngesihluku kutshiye imuli yakhe idabukile.
Ekhuluma lephephandaba lentatheli, umfowabo kamuyi, ongazange athande ukuqanjwa ngebizo, uthe imuli yabo kayikakwamukeli okwenzakeleyo.
“Lokhu akwamukeleki. Sisesimeni sokukhathazeka njalo besingakukhangelelanga lokhu,” kutsho yena.
Njengoba izindaba zokubulawa kwakhe zisiya zisabalala, izakhamizi ezidabukileyo zibuthene kuMuroro Street eDzivaresekwa 2, lapho okulungiselelwa khona ukungcwatshwa kukaLillian.
Izakhamizi zichaze isehlakalo lesi njengesitshengisa ingozi ekhulayo yodlakela olubhekiswe kwabesifazana.
Esinye isakhamuzi uMemory Matunhike uthe abesifazana abanengi endaweni le sebehlala besesaba ngenxa yodlakela.
“Udlakela olubhekiswe kwabesifazana selusanda kakhulu endaweni yethu nxa kuqathaniswa leminyaka eyedluleyo. Sisevalweni ngenxa yalokho okwenzakeleyo.
“Kudingeka ukuthi iziphathamandla zithathe amanyathelo okuvikela abesifazana ngoba sesisesabela impilo zethu.”
Isiga lesi asigcinanga ngokuthathela imuli kaLillian indodakazi lodadewabo, kodwa sitshiye labafana ababili abancane bengaselaye unina, njengoba umphakathi ulokhu usehluleka ukuqedisisa ubuhlungu bokulahlekelwa kwakhe.