Ngingene esithenjini ngingazi

Umkami uthanda utshwala labafazi
NGINGUMAMA oleminyaka engu-31, lomkami siyalingana. Khulu sengidubekile ngendoda le kangisakwazi lokuthi ngithini. Indoda le ithanda utshwala, abafazi kanye lebhawa. Ngimenzeni Khulu ukuze ayekele utshwala lokuthi ayebhawa? Nceda Khulu ngingakafulatheli umuzi wami.

Impendulo
Zwana dade, ngiyakuzwela kakhulu ngenkinga ophakathi kwayo. Iqiniso lithi utshwala badalelwa ukudliwa hatshi ukuthi indoda idliwe butshwala. Ngiyasibona isizungu olaso. Khonokho ukuthi umuzi wami, abanengi besabalele ilizwe lonke leli bedinga imizi ungaqali-ke ukufulathela umuzi wakho. Xoxisana laye umcele ukuthi kungabanjani ukuthi umthengele utshwala ezonathela endlini. Amakhosikazi asebhawa ayisibo bantu ongabalinganisa lawe ohlezi emzini wakho. Lokho kuzadlula ntombi yami. Kawungitshelanga ukuthi intombi zebhawa zikulwisile yini. Ziphelela ebhawa zisale ebhawa. Pho mana mbijana lesi yisivunguzane kuzadlula.

Uthi usemithisile
Sakubona Khulu, ngilohlupho, ijaha ebengithandana lalo lithi lona selimithisile njalo lithi kumele liyovela. Mina bengizigcinile ngisithi kumele siqale sihlanganiswe ngumtshado. Ngithini Khulu ijaha lami bengilithanda kakhulu, ngeluleka. Mina ngileminyaka engu-21 njalo ngiyintombi nto.

Impendulo
Ngikhona mzukulu ngiyaphila. Ulenhlanhla yamaSwazi mntwana. Kambe ngabe lesisiga sikuwele lisanda kutshada ubuzakuphatha njani lokhu. Inhlanhla nansi, umvundla uzivukele esikhundleni, okokuthi ijaha lelo belingaziphathanga ngitsho. Ukwephuka kwenhliziyo asi kufa komuntu. Lo ukudanisile, kuthathe njengesibusiso lokhu. Zinike isikhathi ungaze wajaha ukumkhawulisa ube usufuna ukuthatha inkelu uthi ngabantu. Linda ungaze wavuma njalo nxa efuna ukubuyisana lawe ngoba uzakwenza i-spare wheel. Liyeza mzukulu elakho ijaha elithembekileyo. Ziduduze usithi sekwedlule.

Ngingene esithenjini ngingazi
Ngithemba uqine saka Khulu. Ngingusisi oleminyaka engu-27 ngendile labantwana ababili. Ngathandana losabantwana ngo2008, leso sikhathi wayelomama womntanakhe oyedwa, lubaba wathi kimi balezinkinga ku-relationship yabo. Waphinda wathi umkakhe kafuni ukuyahlala ekhaya kungakho wathi kasamthandi, mina ngavuma ukuyahlala ekhaya. Kungakho ngo2012 ngabuya eGoli ngifuna ukubona ukuthi wehlukana lomkakhe ngamthola ehlala yedwa for 2 months ngasengisiyahlala-ke ekhaya. Uhlupho yikuthi ngahlangana lesinye isihlobo sendoda sathi kimi ngifunani esithenjini ngimncane kangaka mina ngathi angikho esithenjini wathi umkami kazange ehlukane lomkakhe lokhu bethandana futhi balomntwana omncane and mina sengilabantwana ababili. Umkami nxa ngimbuza uvuka ngolaka kangiphenduli, ngile-stress ngilapha kangisakwazi ukuthi ngithini ngihlale kumbe ngimtshiye.

Impendulo
Zwana mina mntwana ukutshiya lokuhlala ngenye indlela. Ijaha lakho leli liyakunika ukudla na? Liyakugqokisa na? Liyakunanza yini na? Ubonanzelela mntanami emhlabeni lapho kulabo lahlangihleke olahla ngidobhe, okhafula ngiginye. Yizo i-character zabanye abantu emhlabeni. Awuboni yini ukuthi uphakathi komhlane lembeleko? Ijaha lakho liyakuthanda kodwa lilula emkhumbulweni wokuzithiba. Nxa yena engakutshelanga lokho ekubonisa izizatho zonezo engikutshele zona ekuqaleni ungazihluphi ngothathawese. Vala umlomo uthule uthi zwi, ugcine abantwana benu. Impilo yomuntu ifana lomgwaqo olamadundulu. Uzathi uthi uyatshiya, iqiniso lithi lingatshona ilanga wonke uyaphumula, funa uthi uyaphumula uphumule emlindini ohlala inyoka. Ukuhwabha lolaka lomkakho yikuvikela indaba yothando lwenu. Uzatshiya uthi uboneni? Thula uthi zwi uginye isidwa ungabi yinhlekisa esigabeni ngokutshiya umuzi wakho. Yebo kambe seyedlula indulo eyayisithi inkunzi ilola impondo ezidulwini. Mfanami ezakhathesi iziduli zilempolompolo. Sengithe ungayingeni eyokuzwa. Iqiniso lithi okulempondo akugoqelwa emgodleni zekele impondo zizithutshele. Phola ntombi uthi zwi ungakhathazeki njalo ungahlokozi inyoka emlindini wayo.