Online Reporter
SEKUQHELILE kunjiva ezinengi ikakhulu lezo ezihamba umthutha khaya ukuthi zifike zidliwe zindunduma zeGoli. Umuntu azenze umuntu ongazalwanga nguyise lonina, afane nje lento eyawa esihlahleni.
Umuntu wakhona uyabe ephethe ehutshuza amanga aluhlaza tshoko, okwenyongo yenkunzi yenyathi edle umahamba ngendlwane, ethi uzathumeza lokhu lalokhuya ngekhufu leKhisimusi. Ikhefu leKhisimusi lize lifike, ajike aqambe amanye amanga athi ukhuthuziwe evela ebhanga usezabona ngekhefu lePhasika kodwa phinde balinde abasekhaya baze badele.
Bayabe bethi bangabona umalayitsha esiyakomakhelwane, bame amadlodlongwane becabanga ukuthi uzabuya lakibo kodwa babone nango esengena indlela esephindela emuva. Sengihambe emingcwabeni embalwa, uzwe kuthiwa kulindelwe umntwana oseGoli othe usendleleni uyeza, ngoba umzali wakhe egula kazange ambone, ufuna ukuzovalelisa.
Kwenye imfa kwamiwa phose iviki yonke kuthiwa kulindwe injiva, sonke sacabanga ukuthi mhlawumbe ufuna ukuthenga ibhokisi lomhlobo obizwa ngolimi lwabondlebe zikhanyilanga amakhasikhethi (casket). Ngempela, walindwa waze wafika, isidumbu sahanjiswa emotsha ukuze singonakali njalo ethembisa ukuthi uzabhadala indleko zemotsha.
Into eyangicaphulayo ngaze ngathukuthela, yikuthi yathi ifika injiva eyindlalifa yayingathwalanga lutho. Kwakungathi nje ngumuntu ovela egangeni ukuyadinga inkomo. Wahlaba umkhosi angani ligogo eligwazwe ngumkhonto ngumzingeli ngapha ezinukela ugologo, kuthe kusisa etshelwa imali ezifunakalayo ezomngcwabo, wakhala ngokuthi ebhoda bambhadalise imali enengi ,yingakho kala ngitsho letshumi lempondo.
Wathi esitsho la amazwi, umdeni wakhona ubona ukuba kumele uqale phansi ukuhlanganisa amakhanda. Kwathengiswa imbuzi ukuze umngcwabo uqhubeke, bazisola ukuthi ngabe abazange bamlinde aluba kabachithanga isikhathi bemelela ize.
Kwathi ngemva komngcwabo injivandini yayingasela mali yokuphindela emuva, yaqala ukuthengisa umakhalekhukhwini lewatshi lejazi, sekudingwa eyokubuyela.
Kwakube ngcono ukuthi umuntu nxa engela mali angatshoni echithela abantu isikhathi, ayekele kusetshenzwe, isililo kasipheli uzaphela abuye esezophosa ilitshe.
Zinengi injiva eziwenzayo umkhuba lo omubi, sithi kini, sicela uxolo, sisebenze ngalokho esilakho hatshi ukuthenjiswa amanga njalonje.
Ayixabene.
