admin
YiNtatheli kaMthunywa
SEKUNGAMAVIKI iqembu leChicken Inn lindiza kalula phezulu kwengalane yeligi yeCastle okuyikhona okwenza umqeqetshi walo uJoey Antipas abike ukuba ujabule kakhulu.
UAntipas ukhulume loMthunywa ngesikhathi ebukele umdlalo weHighlanders leDynamos owenkezo yeChibuku ngeSonto. Umqeqetshi lo ubukele umdlalo lo esanda kuqedelana leHwange yona edliwe 2-0 ngama-Gamecocks kulinkezo.
IChicken Inn ilemiklomelo engamatshumi amathathu lanye kumidlalo elitshumi lasithupha.
“Engingakutsho yikuthi ngiyajabula nje ngendlela ithimu eqhuba ngayo. Ungaze ubuze wuphi umqeqetshi weligi uzakutshela ukuthi ukuhlala phezulu kwelogu kwehlisa umthwalo.”
Uthe njengoba iChicken Inn ingakaze ihluthune inkezo ezwayo lokhe yangena kuligi ephakemeyo, yena uzakutshintsha lokhu.
“Sengibonile ukuthi ngingenelisa ukuyikhuza iChicken Inn ukuze layo ithole izicoco ezizwayo.
“Ngilabadlali abalomfutho lendlala yokudlala ngokupheleleyo. Akulamdlali ongathi udlala ukwedlula abanye kuChicken Inn. Bonke ngibatshela ukuthi beqaphele ukuzikhukhumeza ngoba inguqu ngumdlalo ongeke wafunga ukuthi uyintshantshu kuwo ngaso sonke isikhathi,” kubika lumqeqetshi.
UAntipas wayiphakamisa inkezo yePSL ekuMotor Action ngomnyaka ka2010 loba nje iligi le yayingela sekelo lwemali.
Ukujabula kukaAntipas kuyabonakala lakubadlali bakhe.
Umgadli kuzwa othenjiweyo uDanny “Deco” Phiri uthe kuzatsheka ibhetshu kwamanye amathimu ngoba amaGamecocks awasuki phezulu kwelogu yeligi yePSL.
Umdlali lo ubike ukuthi bazatshibilika ngendlela engakaze ibonakale.
“Nxa senelise ukuthi sikhokhele amathimu wonke okwesikhathi eside kusinika idlabuzane lokuqhubeka sisenza kuhle,” kuveza uPhiri.
Umgadli kuzwa lo uthe kuzamele baqhubeke beligiqa hatshi ukuzigqaja ngokuthi uyalazi ibhola.
“Abadlali basuka bazitshele kodwa thina umqeqetshi wethu usikhuthaza njalonje ukuthi sisebenze nzima.”
Abadlali abakhokhela ngokuhlohla:
Edmore Chirambadare – Chicken Inn (7), Rapheal Manuvire -ZPC Kariba (6),Walter Musona-FC Platinum (6), Lameck Nhamo Triangle ( 5), Tinei Chitora -Chapungu (5), Donald Ngoma-FC Platinum (5), Artwel Nyamiwa-ZPC Kariba (4), Kawondera Richard- Triangle (4), Rusike Evans- Hwange (4), January Timothy- How Mine (4), Tinotenda Kadewere -Harare City (4)
Online Reporter