Online Reporter
Nkosilathi Sibanda
UMQEQETSHI weScottland uTonderai Ndiraya uthe ulenhlonipho enkulu kuqembu leHighlanders ngoba liyinsika yokuphumelela komdlalo wenguqu kuleli.
Ukhulume lokhu ngemva komdlalo weCastle Lager Premiership obuphakathi kwamaqembu womabili eBarbourfields ngeSonto.
“Sidlale leqembu ebelihlelekile, eleHighlanders. Kwakhiwa iqembu eliqinileyo lapha, ngiyakuhlonipha kakhulu lokho,” kutsho uNdiraya.
Uqhubeke wathi: “Kuhle okwenziwe ngabalandeli beHighlanders ngokuza ngobunengi babo. Balisekele kakhulu iqembu labo. Bebelithwalise nzima iqembu lethu isikhathi esinengi. Kodwa, ngiyajabula ukuthi sikwazile ukuthola umklomelo. Khumbula ukuthi le, yiBarbourfields Stadium, awuvele nje ubuye lapha uthole imiklomelo yonke.”
Umdlalo uphele kungutshiki lobhanqa 1-1. IHighlanders iqale ukuhlohla ngomzuzu wesi-81, ku-free kick etshaywe ngukaputeni u-Andrew Mbeba. KuScottland kuhlohle uMthokozisi Msebe ngomzuzu wesi-90.
