Online Reporter
YiNtatheli kaMthunywa
IMULI yakoKhumalo eyiyo ekhokhela isigaba sakoMabhikwa ifunga igomele ukuba ngeke ibuswe ngowesifazana ngoba lokhu umdeni lo wadabukayo akukaze kwenzeke.
Kubikwa abakhokheli bonke bomdabu wakoMabhikwa kumele kube ngabesilisa.
Ingxabano emulini yakoKhumalo iza kulandela ukwethulwa kukaZanele Khumalo (35) ozabe ebambele indodana kaVusumuzi Khumalo, ize ibe leminyaka engu-18.
Kubikwa uZanele Khumalo waqanjwa nguHulumende ukuthi abe ebambe isikhundla senduna uMabhikwa okweminyaka eyisificamunwe munye loba nje kwakuke kwakhethwa uyise omncane uJohn Khumalo.
Isikhulumi semuli yakoKhumalo uDonald Khumalo uveze ukuthi ngokomkhuba wabo owesifazana kavunyelwa ukuthi abekwe abe yinduna.
Uthe akukaze kube lenduna engowesifazana ngokosendo lwabo.
“Ukukhethwa kukaZanele ukuthi abe yinduna kubukela phansi amasiko ethu. Emdenini wethu akukaze kube lenduna engumama, lokhu kuveza ukuthi amasiko ethu ayatshabalala kancane kancane.
“Esikweni lethu lakoMlonyeni akulanduna engumama. Kumele kungene umuntu ongubaba esasimkhethile thina ukuthi nguye ozagcotshwa hatshi uZanele angeke asibuse njalo kakhethwanga yithi, thina njengemuli asikwazi,” kubika uMnu Khumalo.
Ubuye waveza njalo ukuthi akulamuntu wesifazane othatha isihlalo sobukhosi koKhumalo ngoba endele kwenye imuli.
“Amadodakazi ethu ayakwazi mhlophe njalo bayakuzwisisa ukuthi isiko lakoKhumalo alivumi ukuba ubuduna buphathwe ngumfazi. Nxa sihlezi phansi sisemhlanganweni omama bayakuzwisisa ukuba akumelanga babekhona kuleyomihlangano,” kubika uMnu Khumalo.
UMnu Khumalo ubuye wachothoza ikhomithi eyayikhokhelwa yiNduna uNkalakatha ngokufaka uZanele bona njengemuli bengavumelani lakho.
Abanye akade bekulo umhlangano baveze ukuthi ngeke babuswe ngumuntu ongena esikhathini.
UZanele Khumalo wethulwe emphakathini weJotsholo mhlaka 14 Mbimbitho ukuba uzabe emele induna uMabhikwa uWayne Makhosemvelo aze abe leminyaka engu-18 lapho azathatha khona isikhundla sikayise.
Amanye amalunga emuli yakoKhumalo bahambise indaba yokubekwa kukaZanele njengenduna emthethwandaba omkhulu, eHigh Court.
