Online Reporter
Zintatheli zeZimpapers
AMAPHOLISA lezinye ingatsha ezibona ngokugcina ukuthula elizweni zihlezi zizimisele ukwenza umsebenzi wazo ukuze umphakathi uphephe, kutsho uMphathintambo wogatsha lweNational Security, uLovemore Matuke.
Ebikela izizalwane zakuleli, eGutu South, esabelweni seMasvingo, uMphathintambo uMatuke uthe uHulumende uzimisele ukuthi umphakathi uphile ngokuthula, waxwayisa labo abafuna ukwenza udlame ukuthi ngeke bavunyelwe ukuphambanisa ukuthula okukhona.
Ngokunjalo, amapholisa eZimbabwe Republic Police asebike ukuba athumele amalunga ayo endaweni zonke elizweni.
“Ngifuna ukwazisa zonke izizalwane zakuleli ukuthi ukuphepha kwazo kumqoka kithi. Kulenhlelo ezikhona zokuvikela umphakathi. Abezomthetho bazimisele ukuvimba bonke ubudlwangudlwangu, ngasikhathi sinye bencedisa ukuthi abantu baqhubeke ngemisebenzi yabo yansuku zonke,” kutsho uMphathintambo uMatuke.
UMphathintambo uMatuke uvumile ukuthi izizalwane zilelungelo lokutshengisela, kodwa ngeke kuvunyelwe ukuphazanyiswa kokuthula lokuphepha kwabantu.
Uthe ukubambana kuqakathekile elizweni.
“Kasisebenzeni sisonke, sibambe ukuthula lokuxoxisana.”
Kusenjalo, ngoMgqibelo, uMphathintambo wogatsha lwe-Information, Publicity and Broadcasting Services uDokotela Jenfan Muswere ukhuthaze izizalwane zakuleli ukuthi ziqhubeke ngempilo yazo, njengansuku zonke.
Ekhuluma lentatheli, uthe abantu benganaki imbiko ekhitshwa yilabo abasebenzisa udlame olungekho emthethweni abagcwele kunkundla zokuxhumana.
“Njengesikhulumi sikaHulumende, ngithanda ukwazisa uzulu ukuthi ukuthula lokuhlaliseka kuzaqhubekela phambili, kulandela isisekelo sombuso welizwe. Zonke izizalwane kumele zingalandeli imbiko ephuma kunkundla zokuxhumana,” kutsho uDkt Muswere.
