admin
Nkosilathi Sibanda
NGESONTO ekuseni amalunga eHighlanders azakuthi gwaqa eClub House ekhetha uMsekeli kamgcinisihlalo, kukhetho olulwelwa nguBabongile Sikhonjwa loFiso Siziba.
Kuzatsheka ibhetshu kulumbuthano olakho ukutshintsha indlela iHighlanders ebuswa ngayo. USikhonjwa, ongusaziwayo aphinde abengusomabhizimusi koBulawayo uzethule emphakathini weBosso wathembisa ukuthi umele ikusasa leqembu leli, elizakhokhelwa ngabantu abatsha.
USikhonjwa kazange atshaye inja efihla umphini ekhuluma loMthunywa ngoMvulo ukuthi indlela zimhlophe.
“Ubukhokheli beHighlanders bumele buguqulwe. Sesifike esikhathini sokuthi lathi abasakhulayo sitshiyelwe intambo,” nguSikhonjwa lo.
“Ngingena kulolukhetho ngisithi izenzo kungemazwi. Okunengi engilakho ngaleli qembu kuzabonakala.”
Uthe loba angaze anqotshwe, akasoke wayilahla iHighlanders.
“IBosso lilifa lethu, kukithi njalo iqembu ngelakithi. Asilandanga ukuzodinga izikhundla. Sihlose ukukhulisa okungokwethu.”
Abalandeli thize beHighlanders sebelungise umqondo wabo bavumelana ukuthi uSikhonjwa nguye umkhokheli wabo.
Watshayelwa ihlombe umfokaSikhonjwa ekhuluma ngokuthi lesi yiso isikhathi sokuthi iHighlanders itshiyane lokuvalela phandle abasakhulayo, abalakho ukuletha inkalakatha yenguquko.
“Ubukhokheli kumele buqhutshelwane, butshiyelwe abasakhulayo, sibafundise ukuthi kwenziwa njani.”
USikhonjwa uke wabonakala ukuthi ulilunga leBosso elilenhliziyo enhle njalo ulesiphiwo sokuvusa amabhizimusi eqembu.
Ngakolunye uhlangothi, uSiziba uthe yena uza ngobungcitshi lokuba ngumdala kwezobukhokheli benguqu.
USiziba usezibambe kuzikhundla ezinengi kumdlalo kanobhutshuzwayo kumaligi asacathula. Lokhu yikho okumbeka phezulu kukaSikhonjwa okwamanje.
UMthunywa ubuze inkokheli le ukuthi ithembisani ingavotelwa yabika ukuba ilande ukuzokhulisa zonke inhlelo ezikhona, lokukhuthaza ukuqakatheka kokubambana.
“Ukungena kukhetho lolu kungoba ngithunywe ngabantu. Ngakho-ke, ngiqonqosela ukubambana eqenjini, singaxabaniswa lukhetho ngoba iqembu likhulu ukwedlula lokhu.
Ngaphandle kukaSikhonjwa loSiziba, bakhona abanye abafuna ukuvotelwa kusikhundla sikamgcinincebo.
Owayephethe isihlalo lesi uDonald Ndebele useqedile eyakhe indima. Kukhetho lukamgciningcebo kuloBusani Mthombeni lo Xolisani Moyo.
Umqondisi wohlelo lokuvota uPeter Dube utshele intatheli ukuba kulandelwe izinqumo zesisekelo sombuso ngesikhathi behlaziya amadoda la afuna izikhundla.
IHighlanders yilo lodwa iqembu elilesisekelo sombuso njalo elenza ukhetho lwenkokheli.
Online Reporter