adminIMBONGI uMathe lapha utshengisa ubuhle lobubi benkululeko yabesifazana. Kunengi okuhle osekwehlele isifazana ngayo leyo nkululeko kuthi ngakwelinye icele inkululeko yabesifazana le isilethele isilisa kumbe amadoda ubunzima. Imbongi iveza sobala ukuthi isifazana besicindezelwe yisilisa ngandlela bani.
Imbongi ikhumbuza indoda ukuthi ibigqilaza owesifazana imenza isigqili sayo. Isigqili ngumuntu osebenza nzima kodwa engaholi, engabhadalwa. Imbongi ikhumbuza lundoda ukuthi owesifazana ubemsebenzela, emlimela sasilima sayo. Owesifazana lo ubeyenzela zonke izinto emphekela sasigqili sakhe. Imbongi iyambuza lundoda ukuthi sekutheni lamhlanje esekhala okwengane? Isilisa kasikayizwisisi inkululeko yabesifazana esikhona.
Imbongi ilesixwayiso kundoda le ibuza ukuthi kanti uzihluphelani ngalumuntu wesifazana. Imbongi itshela indoda le ukuthi kayimekele owesifazana achelese ngoba usekhululekile. Kayikuzwisise lindoda ukuthi isifazana sesikhululekile. Iyatshelwa lindoda ukuthi ingamtshayi owesifazana lo osekhululekile ngoba ngokwenzenjalo ingadilikelwa lijele. Lokhu yisixwayiso esitsho ukuthi owesifazana lo osekhululekile kasatshaywa uyawazi amalungelo akhe. Indoda ingamtshaya izabotshwa ivalelwe ejele okwesikhathi eside kumbe ifele khona.
“Ungamfak’isandla ngoba’uzadilikelwa lijele.” Njengoba umama eselamalungelo afana lawesilisa imbongi ikhuthaza ubaba ukuthi laye kaphekele umama laye adle ehlezi, adle ethe pekle. Iyamkhumbuza lubaba imbongi ukuthi kenzele umama lokho ayekwenzelwa ngoba laye umama wayemsebenzela lundoda ezihlalele. Lokhu kugcizelelwa yisaga esithi, “kusinwa kudedelwana.” Isaga lesi sitsho ukuthi abantu bayasebenza kuthi ngokuhamba kwesikhathi batshiyele abanye.
Lekugideni lakho kunjalo uyagida omunye adinwe atshiyele abanye nxa esediniwe. Lempilweni lakho kunjalo kukhona umuntu akwenzayo kodwa siyafika isikhathi sokuthi atshiyele abanye. Malungelo bani aselawo owesifazana? Imbongi iwabeka sobala amalungelo la ngokutshela indoda ukuthi ingambuzi owesifazana ukuthi uvela ngaphi ngoba ukhululekile umuntu lo. Indoda kayimekele owesifazana azibonele abangane bakhe. Indoda kayigcine izingane zayo njengoba vele zisebenzisa isibongo sayo, zibongwa ngaso.
Sizwa imbongi ithi kulotsholwa abantwana hatshi umama. Imbongi itshela lindoda ukuthi kayilobolanga owesifazana lo kodwa yalobola izingane zayo. Kunzima lapha ngoba imbongi itshela indoda le ukuthi kawatshe izitshubo zabantwana, ikhalelani yona ilezandla? Iyakhuzwa lindoda ukuthi kayibenzele konke abantwabayo, kanti ifuna benzelwe ngubani? Imbongi itshela undoda lo ukuthi umama lo uyaqoqoda emnyango, kamvulele masinyane ngoba uzazonda.
Uselamandla okuzondela indoda owesifazana lo ngoba usekhululekile. Uqoqoda nje lo owesifazana uvela ku-baby shower njengoba eyitshelile indoda kuthangi. Kuthiwa kayiphangise lindoda ngoba lumama uzaze afikelwe lulaka olukhulu imbongi elubiza ithi lulaka lwemamba. Imamba yinyoka leya elolaka ezonda kakhulu. Imbongi imkhangele lo owesifazana eqoqoda emnyango ngakho ikhuthaza lindoda ukuthi imvulele masinyane ngoba uzazonda. Umama lo uqoqoda nje uvela ku-kitchen top-up ayitshele ngayo indoda izolo.
Imbongi iyaphambili ixwayisa indoda le ukuthi ingambuzi lutho lumama ngoba angazonda okwenyathi enye inyamazana elolaka ezonda kakhulu. Okusobala yikuthi owesifazana lo uselamalungelo amanengi njalo uyawasebenzisa. Izigaba eziseleyo sizaxoxa ngazo kunsuku ezilandelayo.
Online Reporter