adminNGITHEMBA likholisile ikhefu lePhasika bafundi. Kule iviki ngithanda ukuthi sike sifundisane ngamabala anqondileyo okubiza abantu kanye lezinto ezitshiyeneyo ngesintu.
(1) Uyabe enjani umuntu nxa kuthiwa:
(a) yinsumbelume — ngumuntu wesilisa osefanele ukuthi sewathatha kodwa elokhu engakathathi.
(b) Ngumfelokazi — ngumfazi owafelwa yindoda.
(c) Yisigwadi — ngumuntu wesilisa ongakhonjwayo.
(d) Yingalane — ngumuntu olomzimba omkhulu kodwa elembala emincane.
(e) Umfelwa — yindoda efelwe ngumfazi.
(f) Umjendevu — yintombi engakhonjiswayo.
(2) Emitshweni elandelayo bhala igama elilodwa elitsho into efanayo.
(a) Lamuhla sizakudla umumbu owaphekwa wachaywa. — Ufutho.
(b) Lungisani umumbu, amazambane, inyawuthi lokunye ngoba sekusondele ukulima. — Inhlanyelo.
(c) Uthanda ukufaka amazambane acholiweyo esitshebeni. — Idobi.
(d) Imbuzi ube eyikhunge ngomchilo owenziwe ngengxoza. — Igoda.
(e) Lapha okufiwe khona kuzwakala ngabantu bekhala. — Ngesililo.
(f) Umuntu lo uhamba ehlala lapha lalapha. — Ngumhambuma.
(g) Wena uthanda ukukhuluma njalo. — Uyalawula.
(h) Umama uzayifaka amathikili okuqala kusasa indlu entsha. — Ijumo.
(i) Inkomokazi yami yehlisile, isize ikhupha uchago ingakasengwa. — Isizisenga.
(j) Asidle nansi inyama ephekwe izolo. — Isikhupha.
(k) Amaxhegu athanda ukudla amathumbu amancane. — Amalulu.
(l) Landa into yami engigcinela kuyo igwayi lamakhala. — Imfuko.
(m) Ngithengise inkomo engehlisiyo. — Isigqala.
(n) Ungithengisele umntwana wembuzi. — Izinyane.
(o) Basiphe inyama yenkomo ezifeleyo. — Ingcuba.
(p) Simnandi isitshwala samabele akhitshwe emgodini. — Umncantsha.
(q) Ngihlangane lomuntu oloboya umzimba wonke. — Ihwanqa.
(r) Bahlabe inkomo ephiwa unina wentombi enkomeni zamalobolo. — Inkomo yohlanga.
Sihlangane njalo kuviki elizayo bafundi.
Online Reporter