admin
Cornelius Luphahla
ABABALISI bakhuthazwa ukuba benze ama-workshops nyangazonke ngenhloso yokuthuthukisa imfundo kanye lokuphathisana ukuze baphathe kuhle abafundi njalo babafundise ngendlela eqondileyo.
Lokhu kuvezwe nguMphathintambo wogatsha lwezemfundo yaphansi uDokotela Lazarus Dokora kumaviki amabili adlulileyo eLupane.
Ekhuluma emhlanganweni obukhona emavikini amabili adluleyo eFatima High School eLupane uDkt Dokora uchaze ukuthi inengi lababalisi kalifundisi kuhle abafundi.
“Inengi lababalisi kalifundisi kuhle abantwana besikolo, liqakathekisa ukunatha utshwala kuphela litshone lidakiwe. Kambe nxa umbalisi engatshona edakiwe uzabafundisa athini abantwana? Angithi yikho okudala ukuthi aphethe sebhadalisa imali yokubafundisa ngekhefu okuyinto engavunyelwayo, khona kufanele bafunde mahala langekhefu,” kutsho uDkt Dokora.
UDkt Dokora uqhubekele phambili wachaza ukuthi ababalisi kufanele baqakathekise ama-workshops.
“Ama-workshops aqakathekile kakhulu kubabalisi ngakho kufanele bawenze phose nyanga zonke ukuze bakhuthazane ngomsebenzi wesikolo. Ama-workshops la kufanele bawenze belekhomithi yesikolo ukuze babonisane layo ngenhlupho ezikhona esikolo.
“Okunye njalo kufanele ababalisi bakhuthazane kuma-workshops la ngokufundisa abantwana ngokuziphatha kuhle kanye lokufanele bakwenze ikakhulu labo asebethomba.
“Lokhu kungenxa yokuthi inengi labantwana ikakhulu amankazana ayazithwala esemancane ngenxa yokuthi ayabe engafundiswanga ngokuthi aziphathe njani,” kuladisa uDkt Dokora.
Uphethe ngokuthi kuma-workshop la balakho njalo ukuxoxa ngendlela abangaphathisa ngazo abafundi ukuze bavikeleke ekuhlukuluzweni.
“Ababalisi kumele baqondiswe ngendlela yokufundisa abantwana ngokuhlukuluzwa kanye lokuthi kufanele benzeni nxa kukhona ababahlukuluzayo.
“Kunengi ababalisi abangakhuluma ngakho nxa behlangene njalo lokhu kungumlandu kamphathisikolo kanye lomgcinisihlalo wekhomithi yesikolo,” kuphetha uDkt Dokora.
Online Reporter