adminCharles Dube
Kule inkondlo imbongi uThabo J C Nkomo ivalelisa iqhawe elikhulu lesizwe seZimbabwe uJoshua Mqabuko Nyongolo Nkomo. Iqhawe leli selikhotheme yikho nje imbongi ithi: “Hamba kahle Qhawe lesizwe, Hamba kahle MfokaNyongolo, Hamba kahle MfokaMqabuko, Hamba kahle Mdala wethu.” Kulokhu kuvalelisa sizwa ukuba iqhawe leli lizalwa nguNyongolo. Ngenxa yokuthi beselikhulile leliqhawe abantu besebelibiza ngokuthi nguMdala wabo, yikho nje imbongi ithi, “Hamba kahle Mdala Wethu”.
Imbongi ikholwa esiNtwini ngoba icela leliqhawe ukuthi libakhonzele kwabaphansi, amadlozi phela. Njalo imbongi ikholwa ukuthi ohambe kumbe ofe ngaphambilini ulakho ukubalungisela indlela abaseleyo ngoba uthi, “uze usicandele eyethu indlela.” Icunukile ngokufa kweqhawe leli imbongi ngoba ithi “Mhlaba kawunoni,” ngoba abantu bangcwatshwa mihla yonke kuwo okokuthi aluba uyanona phela uthi ususuthi ukuze abantu bangaze bangcwatshwa.
Ngeso lembongi umhlaba lo kawudeli ngakholokhu ukuthi abantu bangcwatshwa kokuphela kuwo. Ngakho lokho-ke imbongi ithi umhlaba kawulazwelo, kawulamusa ebantwini. Konke lokhu kufakazwa yikuthi umhlaba uwathethe wonke amagugu esizwe njalo uthethe wonke amaqhawe esizwe. Iyavuma imbongi ngesaga ukuthi umuntu olungileyo oloncedo ebantwini kaphili isikhathi eside. Isaga asisebenzisayo yilesi, “Ngempel’isitsh’esihle kasidleli.”
Iyakugcizelela imbongi lokhu ngesinye isaga ithi, “Ngempel’kuf’igul’elilamasi.” Lapha igcwalisa ukuthi kufe umuntu obeqakatheke kakhulu. Beliqakatheke kakhulu leliqhawe elinguJoshua Mqabuko Nkomo. Imbongi ithi ikhala zome izinyembezi ngoba inhliziyo yakhe idabuke kakhulu ngokufelwa yileliqhawe. Ngalokhu ithemba lakhe linciphile, selilincane njalo usephicekile, udidekile kasaqedisisi izinto ngoba nampu ubuntandane bubafikele ngodlakela.
Bubafikele ngolaka bengalindele.
Imbongi ithi sebemanxebambili ngokulahlekelwa okukhulu. Ukudana lokhu ikuveza ngokuphinda njalo ukuthi ukufa akunoni njalo akudeli ngoba kuqhubeka kubaqeda abantu. Ukufa lokhu akulantandane ngoba zinengi okwesabekayo intandane okokuthi aluba kuyazizwela lezi intandane nga akusekho ukufa lokhu. Kusobala njalo ukuthi ukufa lokhu akulamngane. Akulasiphaqa ukufa lokhu njalo akulambala ukuthi kungathiwa kunje.
Imbongi ayikuqedisisi ukuthi kuyisimakanjani ukufa yikho ibuza: “Kuf’ulilibho na?” Ilibho yinto engaqedisisekiyo edinga ukuchasiswa. Iyabuza njalo imbongi ukuthi ukufa nga kuyabalekelwa na? Ibuya ibuze imbongi ukuthi khona kuyakufa na ukuze bakuzilele. “Kodwa siyakuzilela nini weNokufa? Ukuthi Nokufa kutsho ukuthi nina wokufa, yikho imbongi ithi sizamzilela nini yena unina wokufa. Imbongi iphetha inkondlo yayo ngokusitshela ukuthi ilizwe limangele kalilankani njalo ligutshuzelwe liyezi elimnyama kakhulu.
Lokhu kugcizelelwa yisenzukuthi, “khaca” esifakaza umnyama omkhulu.
Online Reporter