adminOphezulu Stinta
Sisaqhubeka lendatshana elesihloko, Abakhongi. Kuphakathi kwengxoxo yabangane ababili uDudu loThobile abayitshisa kusalindelwe abakhongi labo asebethethe isikhathi eside bengasathutshi. Besaxoxa nje ngezitshisayo uThobile wasukuma walunguza ngasefasiteleni lapho esizwa ukuthi kulomuntu owayekhuleka emzini wakwabo.
Lapho wahle wabona kungcono ukuthi afake impahla ezikhangelekayo hatshi okwakuzamyangisa phambi kwabakhongi abaphakeme kangako. Kusenjalo wangena uMaNzuza ekhefuzela okwaze kwethusa lendodakazi eyayilindele ukuthi unina athokoze nanko nje amaphupho lezifiso kwasokuzafezeka sebefikile abakhwenyana.
UMaNzuza wakhefuzela ebika ukuthi kukhona okungahambi kuhle lapha phandle. Abakhongi abaphandle kabatsho kumbe kabazibiki bengabakoBhengu, kodwa bavela kwaShezi. Kuyacaca ke ukuthi labo bathunywe nguThemba njengoba laye wayetshilo ukuthi wayezothumela abakhongi ngenkani. Pho sekungabakhongi phezu kwabalindiweyo, bazayithini abakoNgema? Ngolaka kanye lokuphazima kwelihlo uThobile wavele nje wathi kunina kabadudule babuyele lapho abavela khona.
Waya ngolaka ke yena ecingweni. Watshaya ngolaka exwayisa uThemba ukuthi angaphindi nje athumele abantu bakhe. Yena Thobile wayesethole umuntu ayesezimisele ukutshada laye.UDudu wayebukele wonke lo umdlalo mfanekiso owawusenzakala lapha esekhexe owangaphansi, emangele okwamagama, kodwa ecaca elozwelo thize ngoThemba lo ophathwa ngaloluhlobo ngoba engumyanga.
Wangena njalo uMaNzuza esevela dudula abakhongi bakaThemba ngezakhe. Wayengabafuni ngitsho lakancane. Uthi yena amazwi akhe kukhasi 53, “Abakhongi esibalindele thina abakwaBhengu. Abantu abaphucuzekile, abanothile, hayi imiphuphe yeTheku.”
UNgema wayebukele konke lokhu kusenzakala wakhalima kanye ukuthi ngeke aze abukele abantu besenza imbudane nje emzini wakhe into engelasimilo. Uyaloyisa ukuthi ngumuntu otheni kodwa ufikelwa ngabakhongi ababili ngosuku lunye.
Kusenjalo kwenzakala ilizwi likhuleka phandle. Laba ke kwasekungabakoBhengu. Wehluleka ukuzibamba uMaNzuza wathi lothu ngelithi yibo abantu abalindelweyo labo. Wayengafuni lokuthi batshiswe lilanga ngokulinda phandle.
Online Reporter