O-LEVEL: Ukuhlaziya inkondlo, Ngiyakuthanda Aids – uJerome R Nyathi

Charles Dube
Kambe kasisimanga lesi esikhulunywa yimbongi lapha isithi ithanda i-Aids umkhuhlane ongumbhuqazwe owesatshwa phose yiluntu lonke emhlabeni. Ilezizatho zayo ezinhle imbongi okwenza iyithande i-Aids. Uthi abantu bathi iAids imbi ngoba bebabi. Abavumi iqiniso abantu ngoba likhomba ububi babo. Iyaphambili imbongi isithi abantu bathi i-Aids ilolunya ngoba bona bengalunganga.

Ngokubona kwembongi akulabubi lokungalungi kuAids kodwa abantu yibo abasilela ekulungeni. Kayilabubi i-Aids kodwa abantu bayesulela lokho abayikho khona bona njalo besazi ukuthi i-Aids ayilakubaphendula.

Imbongi iyazikhuthaza ukuthi ingaphiki ngabo abantu ngoba yona iyayithanda ngokuthi yenza abantu bazinuke amakhwapha.

Ngalesisitsho imbongi ithi abantu kabazihlole bazibone ububi babo.

Iyaqhubeka imbongi isithi iyayithanda i-Aids ngoba ithi abantu kabagcine amasiko wona alokuziphatha, i-Aids njalo ithi abantu bathandane njalo bahloniphane. Yebo bahloniphe umthombo wempilo. Iyagcizelela imbongi ithi iyayithanda i-Aids ngoba ithoba abazigqajayo njalo iqondisa iziqhwaga. Iziqhwaga yilabo abahlupha abanye, bephatha abanye ngodlame bezenza inkonjwa. I-Aids iyabachumisa abanjalo ngokubahlasela.

Sizwa njalo ukuthi i-Aids isifundisa ukuthi akula osebenzela omunye ngesaga esithi, “akulankwal’ ephandel’ enye.”

Yona iyayithakazelela iAids ngoba ithi kabahlale bonke bengehlukani.

Iyajabula imbongi ize ibuze iAids ukuthi yamvelela ngaphi yona eyenza yabafundisa indlela enhle. Yabafundisa ukuthi baziphathe kuhle.

Iyavuma imbongi ukuba iAids iliqiniso lokuphila njalo iAids inhle ngoba kayiqali muntu. Ngalokho imbongi itshela uZulu, uMthwakazi ukuthi kazisole yena kodwa yena i-Aids uyayithanda.

Imbongi ithi labo i-Aidsebathathayo ibasa elizweni lesithembiso lona eladalelwa abantu njalo balithenjiswa nguMdali phela. Imbongi ithi i-Aids kayilabubi ebenzayo kodwa yenza lokho ekuthunyiweyo ukuzobulala. Lokhu kucaca nxa imbongi isibuza uZulu ukuthi ngubani lowo owathi ikhaya lethu lilapha?

I-Aids kayilandaba ukuthi lo ngomncane kumbe ngomdala ihlasela bonke. I-Aids ilomlayo owodwa kuphela othi abantu baziphathe.

“Wena owakho umlayo munye: Ziphatheni!”