adminOphezulu Stinta
Kundatshana elesihloko esithi Abakhongi sitshiye emzini kaNgema kulindelwe abakhwenyana ngamehlo abomvu.
Phakathi kokulinda kanye lamalungiselelo ayenziwe kukhona nje okuthe phecelezi ngesimilo sikaThobile.
UThobile lo kucaca yintombi ebisikhulelwe, emithiswe nguThemba njalo lowo Themba kazange aziswe ngomthwalo lowo. Ngesikhathi esifanayo yikho njalo uThobile abonana khona loBhekifa lo othandwa ngunina kakhulu ngenxa yenotho yakhe. Ngesimilo esitshekileyo lokungazihloniphi uThobile wabona kungcono ukuthi asuse umthwalo lo owawusiyimpazamo kuBhekifa. Konke lokhu wakwenza nje engelasazela.
Ukususa umthwalo lo kakuzange kube yinto elula ngoba waphosa wafa ngokubalisa kwakhe echaza ukuthi insuku zasezizinengi. Kulapho agijinyiselwa kudokotela uMtshali onguye owahlenga impilo yakhe ekufeni. Laye ngowakhe umlomo uyatsho ukuthi lowo dokotela uzamlibala efile. Ngelenhlekisa uDudu laye ugcizelela ukuthi ngeqiniso wayengamkhohlwa kanjani umuntu omsize esephose ukuchithekelwa ngumendo omuhle kangaka. Abadala bathi umendo kawuthunyelwa gundwane kungathi uDudu lo ubona ngelomuntu omdala. Uyambuza umngane wakhe ukuthi pho ulithumele na igundwane kulo umendo owaphose wagxangukelwa yikufa, okutsho ukuthi laye kukhona okuthile akusolayo endabeni le.
UDudu uyihlokoza nxa zonke indaba yomngane. Uyabuza njalo ukuthi uThemba phela laye wayelalo ikhono lokumakhela umuzi bahlale ngoxolo kumnandi kunjeya kungani nje wahle wamginyela ameva. Ngelokuzivikela uThobile ugcizelela ekuthini wayezothini ngezithembiso ezazelekana kungekho ngitsho lesisodwa esigcwaliswayo.
Kuye nje uThemba wayemdlalisela isikhathi kuphela.
Isatshisa ingxoxo yalaba ababili okulapho okuvuleka zonke imfihlo. UThobile uveza olunye udaba olungasuke luguqule isimo senhlelo zonke. Uxoxela uDudu ukuthi uThemba wayesevuke phansi ngalezo nsuku emncenga ukuthi babuyisane. Lapho-ke kwelokubuyisana wayezimisele ukuthumela abakhongi ngenkani. Kuye uThemba kwakuyindlela yokubonisa ukuthi ngeqiniso wayezimisele ukunyathela ngolutsha loba nje ngasentombini kwasekuyize.
Online Reporter