admin
AKUKAZE kumfikile enqondweni yakhe ukutshiya i-Orlando Pirates ngesikhathi ekhuhla ibhentshi uTendai Ndoro osephenduke umsindisi wabadlali beZimnyama.
UNdoro (28) odabuka eZimbabwe usehlohle amabhola amahlanu emidlalweni yeligi kusukela enikwe ithuba kunyanga ezimbili ezedluleyo. KuNedbank Cup, uNdoro useyibhakuzise amahlandla amahlanu inethi emidlalweni emithathu aseyidlalile.
Umgadli lo ubegijima kuMpumalanga Black Aces ngesizini edluleyo njalo waphenduka iqhawe eqabulisa amabhola amabili enethini.
Kuhlandla lakuqala leligi yeAbsa, uNdoro ubelizwa ngendaba ijesi, kugiya uThamsanqa Gabuza loKermit Erasmus oseyibamba eFrance. ULehlohonolo “Major” Majoro nguye obelekelela laba badlali kwazise uNdoro ubeyibuka ehlezi.
Ekuqaleni kwesizini uNdoro nguye owatshaya umbekwa owenza eZimnyama zaba ngompetha weCarling Black Label.
“Ngifuna ukubonga ozakwethu okuyibona abangiphakela amathuba okutshaya amabhola. Okubalulekile kimi yikuthi ngitshaye amabhola umdlalo ngomdlalo engiwudlalayo njengomgadli. Awukaze ungifikele umqondo wokutshiya iPirates ngesikhathi ngingadlali. Mina ngingumqobi ngokuzalwa ngakho bengizimisele ukulwa lize lifike elami ithuba lokudlala,” kutsho uNdoro.
Kulamasizini adluleyo iBucs isizame inqwaba yabagadli bangaphandle kodwa inengi labo lize lihambe lingenzanga lutho.
Phakathi kwabagadli bangaphandle abathengwe yiPirates kumasizini adluleyo singabala u-Ezenwa Otorongu waseNigeria, Chikeopo Msowoya loHelder Pelembe waseMalawi, Davies Mwape waseZambia, Abbubacar Talatou waseNiger, Ralph Matema loGilbert Mushangazhike abaseZimbabwe.
Bonke laba abadlali bafike eNingizimuAfrika belodumo kodwa baze bahamba kuleliqembu bengafinyelelanga ezingeni.
“Kimi akubalulekanga okwenzakale eminyakeni edluleyo. Okumqoka yisizukulwane engidlala laso manje. Ngakho ngeke ngithi ngiyiphendulile inkinga yePirates ebikhangelane layo ngabagadli bangaphandle.
“Okungikhuthazayo yikudlala labadlali abazimiseleyo njengalaba engidlala labo zonke insuku. Okwami yikuthi ngibakhokhele ngokuhlohla,” kutsho uNdoro. — Ubulembu
Online Reporter