Online Reporter
OMAKHALEKHUKHWINI bayingxenye enkulu yempilo yansuku zonke yabantu kulezinsuku. Kodwa abezempilakahle sebexwayise ngokuthi ukusebenzisa iselula lalapho uxoxa khona lomuntu kungaba lomthelela omubi kwabathandanayo.
Bathi ukwenza lokho, okwaziwa phecelezi ngokuthi yi-phubbing, kwenza ukuthi kuqamuke ukuxhumana phakathi kwakho lomuntu oxoxa laye, kangangoba kuyenza lokuthi lowo muntu ohlezi laye azibone edelelekile noma engabalulekanga.
Yiloba lokhu kungabukeka kungelabungozi, khepha ukukwenza ngokuvamile kungaphazamisa ingxoxo yakho lomuntu kuze kudale ukufa kubudlelwano benu ekhaya, emsebenzini nanoma yikuphi lapho elingabe lixoxa lihlezi khona.
Njengoba ukusebenzisa umakhalekhukhwini sekuyinto yansuku zonke ukuxhumana lokusebenzisa izinkundla zokuxhumana, kulula ukucina usulomkhuba wokulokhu uwuqalaza. Nokho inkinga enkulu iqala uma sekusenzakala njalonje lalapho uhlezi lomuntu libhekene lixoxa, ngoba kwenza ukuthi azizwe engabalulekanga.
Kungani i-phubbing idlondlobala kangaka kulezi zinsuku? Lokhu kungenxa yokuthi ama-smartphone lezinkundla zokuxhumana kwenza ukuthi ukuxhumana kube lula kakhulu, kodwa futhi kutsho lokuthi abantu bazohlala beyaluza kude le ngemicabango ngenxa yemiyalezo engapheliyo engena yelakanyana usuku lonke ocingweni, okwenza ukuthi kube nzima ukugxilisa umqondo entweni eyodwa.
Abezempilakahle bathi kuba nzima ukubeka umakhalekhukhwini phansi ngenxa yomthelela wawo emqondweni womuntu. Kuthi njalo uma kungena umyalezo ecingweni kube lento ethi wuqalaze ngokutshesha, okwenza ukuthi abantu bahlale beqalaza omakhalekhukhwini babo ngokuvamileyo.
Lokhu kuba yinkinga ngokuthi njengoba abantu abanengi besebenzisa omakhalekhukhwini babo emsebenzini, futhi bethumelana lemiyalezo usuku lonke. Kokunye benza konke lokho ngesikhathi esisodwa bese kuba nzima ukuwubeka phansi uma sekumele uxhumane noma uxoxe lomuntu ophambi kwakho.
Minengi imthelela yalokhu ethandweni.
Okwakuqala kungenza ukuthi kwehle izinga lokuthandana kwenu. Kungadala lokuthi umuntu othandana laye abone sengathi awumhloniphi, aze akholwe lokuthi lokho okunake ocingweni lwakho kumqoka ukwedlula yena.
Lasemidenini kuba lenkinga ngokuthi abazali abahlala bematasa ngocingo ababe besakwazi ukuba lesikhathi esikahle lesingelakuphazanyiswa lezingane zabo, okungenza ukuthi umntwana abone sengathi kanakekile. Kuba ngumuzwa ofanayo futhi kubangani.
Akupheleli ebudlelwaneni kwabathandanayo kuphela, njengoba kutshaya kuzwele futhi emqondweni ngokuthi ukubona sengathi uyazitshwa kungenza ukuthi ubone unganakwanga, uzizwe ulomzwangedwa kwehle lokuzethemba.
Ukuhlala umatasa lomakhalekhukhwini kungenza ukuthi ungabi laso isikhathi esaneleyo sokuphumuza umqondo lomzimba.
Ongakwenza ukukuqondisa lokhu yikuzama ukwenza ezinye izinto, ungasebenzisi umakhalekhukhwini. Beka umakhalekhukhwini eceleni uma lihlezi lingumdeni ukuze iqinise ubudlelwano benu bokuxoxa ngokukhululeka.
Ungacitsha imisindo yokungena kwemiyalezo engelasidingo lengaphuthumiyo. Ungabi ngumuntu omisa yonke into ngoba ufuna ukuphendula imiyalezo yakho. Khuthaza ozwana labo ukwenza okufanayo. —Isolezwe
