admin
Ethel Ncube
KULABOMAKOROKOZA abane abemgodini weDurban eNyathi ababhaxabule omunye wabo waze wafa kubangwa ukuyagigisa igolide.
Indaba le yenzakale ngeviki ephelileyo lapho umuyi, uDumisani Madzikanda oleminyaka engu-36 abhaxabulwe ngabanye asebenza labo ababalisa uMthandazo Moyo (26), uErnest Tshuma (36), uCalisto Marira (42), loMehluli Gumede kubangwa usuku lokuyagigisa amatshe ukuze kubanjwe igolide.
Kuzwakale ukuba abane laba bathelela uDumisani bamtshaya bamtshiya endleleni elimele esopha ngendlebe lamakhala ngoba esithi bayegigisa ngosuku olulandelayo.
UMthunywa uzwe njalo ukuthi ngosuku olulandelayo omunye walaba abane wabuyela njalo lapho ababetshiye khona uDumisani wafika wamtshaya futhi okunakanelwa ukuba yikho okwabangela ukufa kwakhe.
Kubikwa isidumbu sikaDumisani sabonwa ngomunye owayesedlula wayabikela amapholisa. Isikhulumi samapholisa esabelweni seMatabeleland North uInspector Glory Banda uqinisekisile ukuvulwa kwecala lokubulawa kwendoda ngasebenza labo.
“Sichwayisisa udaba lapho okucatshangelwa ukuba kulowesilisa obulewe ngabanye asebenza labo kubangwa igolide.
“Sikhuthaza uzulu ukuba bengalwi nxa bethe bangazwanani kabadinge omunye abancedise ukucazulula udaba lwabo njalo labo abephula umthetho uzababopha” kuphetha uInsp Banda.
Online Reporter