admin
YiNtatheli kaMthunywa
KUBE lusuku oluhle kubathandi labalandeli bomdlalo wenguqu eLupane kulandela ukusungulwa komkhankaso weNsimbi Cup, odibanisa amaqembu akuLupane Soccer League.
Inkezo le yandulela ukuqala kweligi leminye imincintiswano ezakuba khona ngokuya kwesizini. Inkezo yeNsimbi Cup ihlawulelwa nguLetseletswe Nsimbi. Usomabhizimusi lo uzaphinda njalo asekele iSuper Cup, League Cup le Champion of Champions.
Zivulwe ngoMgqibelo odluleyo inkundla zakulindawo lapho amaqembu ayisitshiya galombili abuthaniswe kumaqoqo amabili.
Kumbuthano wokusungula imidlalo obungoMgqibelo enkundleni yeMtshekisaneni, eShabulana, budebuduze lenzikini yeLupane, kuqonqoselwe ukuthi ithalenta lenguqu kulindawo lithathele phezulu usekelo olulethwe nguNsimbi.
Isikhulumi seLupane Soccer League uPermanent Sibanda ubike ukuba abanqobi bomncintiswano weNsimbi Cup bazathola umvuzo wemali lokusekelwa ngempahla yokusebenzisa emdlalweni.
“Amathimu asefakwe kumaqoqo amabili, linye ngalinye lilamane. Umncintiswano usekelwe ngemali. Sikhangelele ukuba amaqembu ethu ancintise kuNsimbi Cup, Super Cup, League Cup lenkezo yeChampion of Champions,” kutsho uSibanda.
“Konke lokhu kusekelwa nguLetseletswe Nsimbi, ogcizelele ukuthi abadlali bonke baziphathe njalo bakubone ukuba bayahlonipha imithetho yenguqu labonompembe.”
Ngokutsho kukaSibanda, sekubonakala ukuba kulethalenta elizwayo kulindawo. Ubike ukuthi ukusungulwa kweligi le kuza lamathuba amahle ngoba abadlali bezigaba ezehlukeneyo sebezaziwa labo kulumdlalo.
“Sikhangelele ukuthi sokuzakuba lomncintiswano omkhulu ikakhulu ukuphuma kwethalenta elicatshileyo emaphandleni. Iligi yeLupane Soccer League ihlose ukuvusa isigaba sethu. Idolobho leLupane yisigodlo seMatabeleland North ngakho kubalulekile ukuthi ukukhula kwalindawo kusekelwe yimidlalo enjengenguqu.”
Iphephandaba likazulu likhulume losomabhizimusi uNsimbi othe inhloso yakhe yikuncedisa isigaba seLupane ukuthi sithuthukise ithalenta labasakhulayo kwezemidlalo.
“Siyakha isizwe ngokuphakamisa intsha yakithi. Endaweni yokuthi abafana laba batshonele ukubhodabhoda bengenzi lutho, kungcono ukuthi bancediswe ekudlaleni kwabo inguqu leminye imidlalo. Ngokwenza njalo siyabaphakamisa,” nguNsimbi lo.
Uthe baphakathi kokuxoxisana labaqeqetshi bamaqembu eligi ephakemeyo, kuPSL ukuthi bavakatshele eLupane ezocupha ithalenta.
Ngesizini ka-2019 iqembu leMtshibini leLupane City atshikilisana kubangwa ukuba yingqwele yeligi le kumidlalo embalwa esisele.
ILupane City yaphetha isiyintshantshu ihamba phambili ngemiklomelo. Ngaphansi kwengalane kwahlala iMhlahlandlela FC. Ezinye ezincintisa kuLupane Soccer League kuleShining Stars, iHotspurs leUnited Forces.
Iqembu le-United Forces lidlalelwa ngamapholisa akuZRP labaphathi bamajele.
Ukusabalala kwenguqu yeLupane kubonakala ngokusungulwa kwamaqembu ahwatsha ingcitshi zabadlali abalisa iMhlahlandlela elabadlali abaphuma esiqintini seMatshiya, iShining Stars eyeLupanda le-Invaders eyeShabula.
Online Reporter