admin
Cornelius Luphahla
ABESIFAZANA esiqintini saku-9 eKenilworth ngaphansi kukasobhuku uMicah Jealous Mhlophe sebesungule iphurojekithi yokulima imibhida kunye lehanyanisi njengendlela yokuzithuthukisa.
Omama laba abaqoqana baba liqembu elilamalunga alitshumi balima imibhida lehanyanisi ngenhloso yokuthengisa ukuze baziphilise lezimuli zabo.
UMthunywa ukhulume loMgcinisihlalo wabomama laba, Nkosazana Sikhathazile Sibanda wachaza ukuthi balenyanga ezintathu beqale ukulima.
“Sesilenyanga ezintathu siqalise ukulima imibhida njalo sifisa ukuthi ethubeni elizayo siqhelise isivande sethu.
“Iphurojekithi le siyisungule singabesifazana bodwa sizama ukukhuthaza abanye omama ukuthi bangahlali phezu kwezandla kodwa bafunde ukusebenza njengabesilisa,” kutsho uNkszn Sibanda.
UMthunywa wenelise njalo ukukhulumisana loNkosazana Felina Nyathi olilunga lephurojekithi le wathi sebeqalisile ukuthengisa izilimo zabo.
“Izilimo zethu sizithengisela izakhamizi kunye lababalisi njengoba singakabi lemibhida eminengi kodwa ngendlela iphurojekithi yethu ethuthuka ngayo kusobala ukuthi kufanele sidinge ezinye indawo esizathengisela khona,” kulandisa uNkszn Nyathi.
Esinye njalo isakhamuzi esikule iphurojekithi uNkosazana Sizalobuhle Mabhena ubikele intathelizindaba ukuthi ensukwini ezizayo bafisa ukufuya inkukhu.
“Ngokuya kwesikhathi sifuna ukuthuthukisa iphurojekithi yethu silime imibhida ngakolunye uhlangothi sifuya inkukhu zama-broiler kanye lezamaqanda,” kuphetha uNkszn Mabhena.
Online Reporter