Online Reporter
Lovemore Dube
OSELEYO usele ngoMgqibelo lapho okuzabe kuhlangene khona intshantshu zokugijima enkundleni yeWhite City, koBulawayo.
Abagijimayo bazabuthana koBulawayo bekhangelele ukuba bakhethwe ukuncintisa kumidlalo emikhulu ezayo lonyaka.
Abaqoqi bemincintiswano le abeNational Athletics Association of Zimbabwe (Naaz), bathe bafuna ukuthi abaqinileyo abalitshumi badwetshwe phansi, bahlale bekulabo abakhangelelwe ukuthi bangamela ilizwe.
IZimbabwe ilethemba lokuthi kuyiwa phambili ibe labangagijima i4x100m le4x400m relay, egijinywa kuphiwana isigodo.
Kumidlalo yeWhite City le, kuyabe kubukwa ngezikhathi, ibanga eleqwayo lomango walokhu okujikwayo.
Umgcinisihlalo weBulawayo Athletics Board uWatson Madanyika uthe: “Sizakuba labagijimayo abavela kumagumbi wonke akuleli, abafisa ukuthi bamele ilizwe kumincintiswano ezayo. Minengi imincintiswano yabadala labasakhulayo ekhona lonyaka.”
Imincintiswano ekhona lonyaka igoqela ama-World Relays azabanjelwa eBotswana lapho iZimbabwe ekhangelele khona ukuthi ingafaka amaqembu e4x100 le4x400m lelinye elilamajaha labodade iMixed Relay.
Kodwa, ukuze kufikwe lapho kumele kube labakhethwayo abazagijima kumincintiswano eyenza abantu bathole ilungelo lakhona.
Abasakhulayo labo ngoNhlangula bakhangelelwe ukuthi bazaya elizweni leMauritius njalo benze ngcono badlulele phambili baye kweleMelika kumaWorld Junior Championships.
Asebekhulile bona bazaya eGhana kuma-African Championships besekusithi ekugqibeni umnyaka kuzaba lama-Africa Union Sports Council (AUSC) Region Five Games eMozambique.
Kunengi okokulwela lonyaka kumdlalo wokugijima.
Abaqeqetshi bamaqembu elizwe uPhakamile Lisimati, uBraid Nhubu loSilas Muringani bazabebekhona kumidlalo le bekhangelele ukuthi bakhethe abangcono.
Kukanti, ngoLwesine langoLwesihlanu abeNational Association of Secondary School Heads Bulawayo Central District bazadibana eWhite City Stadium kuhloswe ukukhetha abazamela isigaba kumincintiswano ezaletha ezinhlanu koBulawayo.
