Online Reporter
Media Mpofu
IBHOLA lenyawo elidlalwa ngabesifazane kuZimbabwe Women Premier Soccer League (ZWPSL) sebetshengise ukuthi balethalenta njalo bayenelisa ukudlala okuthokozisayo ukwedlula abesilisa.
Lokhu kubonakala ngendlela abadlali bamathimu akuligi le abahlohla ngayo. Akula mdlalo ophela kungela bhola elihlohliweyo. Ngeviki elidluleyo, iqembu lePlatinum Royals linqobe iBuffalo Sports Academy 13-0, kumdlalo labo abawubukeleyo ababike ukuba ubuhlabusa, enkundleni yeVengere. Odade bePlatinum yibo abakhokhela ilogu okwakhathesi.
Kweminye imidlalo, iChapungu Queens iqine yabambelela endaweni yesibili kulogu, kulandela ukunqoba kwayo 4-0 phezulu kweHighlanders Royals. Kube lilanga elibi kubadlali beHighlanders Royals nanko iqembu belinqobe kakuhle ngeviki edluleyo, livela nqotshwa kumidlalo emibili.
IBlack Rhinos Queens idlule itshelela kuSheasham Gweru Queens nge 7-0, iKwekwe Queens layo ibeleviki elihle, isidla iCraneborne Royals 2-0.
Iqembu lamapholisa, eleBlack Mambas Queens litshitshilizwe yiManingi YSA nge 2-1.
Ikhona imidlalo engazange iqhutshwe kulimpelaviki ngenxa yokubizwa kwabadlali kuqembu lelizwe, ngokutsho kwelinye ilunga lebhodi yeZWPSL, u-Arthur Gorejena.
“Ukwedluliselwa phambili kwemidlalo kube ngenxa yokubizwa kwabadlali kuqembu lelizwe. Kube yisinqumo esibalulekileyo esibeka phambili ukuthuthukiswa kwabadlali bethu kunye lempumelelo yeqembu lelizwe,” kutsho uGorejena.
Impumela yemidlalo:
NgoMgqibelo: Red Buffalo 0-13 Platinum Royals, Sheasham 0-7 Black Rhinos Queens, Black Mambas 1-2 Maningi YSA, Highlanders Royals 0-4 Chapungu Queens, Kwekwe Queens 2-0 Cranborne Royals.
NgeSonto: Conduit Soccer Academy 0-6 Herentals Queens.
