Online Reporter
Muchaneta Chimuka
MURUME mukuru wekwaSeke akashaya pekupinda nenyadzi mudare apo aitongwa nemhosva yekubata magadziko emumwe mudzimai uyo aiva muchitoro maanoshanda.
Mutongi wedare reChitungwiza Magistrate’s Courts Tinashe Tashaya akati Elvis Shinga (30) wekwaSeke Materera adzoke mudare iri munguva inotevera apo achapihwa mutongo wake.
“Mhosva yekubata mudzimai uyu magadziko ndinoibvuma asi kuti ndakazviita ndakadhakwa,” anodaro.
Shinga akambotanga achiramba nyaya iyi achiti akabata mudzimai uyu mapendekete kwete magadziko.
Muchichisi Cecilia Mashingaidze akaudza dare kuti nemusi wa4 Kukadzi zuva rava kudoka, mumhan’ari Chenai Kumbirai Musekiwa (37) akange ari pazvitoro zviri paSeke Materera achibatsira vatengi apo Elvis akapindawo muchitoro ichi.
Chenai anonzi akakotama achida kutora mari yainge iri mubhokisi rinochengeterwa mari iyo akanga achida kutambidza mumwe mutengi panova pakatora Elvis mukana wekumubata magadziko.
Chenai, uyo asina kufara nazvo, akabva atendeuka ndokumubvunza kuti sei ainge amubata asi Elvis akabva atiza.
Nyaya iyi yakazomhan’arwa kumapurisa zvikaita kuti murume uyu asungwe.
Online Reporter