Online Reporter
Nkosilathi Sibanda
KUPHENDUKE kwaba yisixhobexhobe kuqhamuka udlame enkundleni yeChahwanda eKwekwe kumdlalo weHardrock leDynamos.
Kulumsindo owadala ukuthi unompembe uMhaka Magare amise umdlalo nanko abalandeli bamaqembu womabili bangena phakathi kwenkundla kulandela lokhu, kwaba labalandeli abambalwa abeDynamos abalimala kakhulu ngenxa yokutshaywa ngabeHardrock.
AbeHardrock kukhanya kabazange bavume ukudelelwa ekhaya labo loba nje lokho abalwenzayo kwakungaphandle komthetho wenguqu.
Lenye impahla yenkundla yeChahwanda, evulwe lonyaka, yabhidlizwa.
Ngokunjalo, kuthe kusenziwa uphenyo, kwatholakala ukuthi umaqhuzu weHardrock uKudzanai Hove wayelesandla kulokhu.
UHove ubotshwe ngamapholisa ngoLwesibiki njalo usemiswe umsebenzi.
Umdlalo lo usudale ukukhuluma okukhulu emdlalweni webhola lenyawo kuleli njengoba sekulokukhathazeka ngokwanda kodlakela obuqhutshwa ngabalandeli enkundleni.
Inhlanganiso yePremier Soccer League lamaqembu sebehlala bekhuthaza abalandeli ukuthi bavikele isithunzi somdlalo kulandela izehlakalo zodlakela ebezibonakala kwezinye inkundla kuleminyaka esanda kwedlula.
Kumbiko okhitshwe liqembu, iHardrock ithe ubukhokheli beqembu sebuvumelane ukumisa umsebenzi kaHove kuze kuphele uphenyo oluqhubekayo.
“Ubukhokheli beHardrock FC sebuvumelene ukumisa umsebenzi kaMnumzana Hove okwesikhathi esingaziwayo kusalindwe impumela yophenyo,” kutsho umbiko lo.
Iqembu liphinde lagcizelela ukuthi kalisekeli loba yiluphi udlakela olwenzakale kulumdlalo.
“Sisola ngamandla wonke udlakela lokubhidlizwa kwempahla okwenzakeleyo. Ukuziphatha okunjalo kuphambene lezimiso zeqembu njalo kakulandawo emdlalweni webhola,” kutsho iqembu.
IHardrock ithe izasebenzisana lamapholisa eZimbabwe Republic Police labanye abakhangele umdlalo ukuze bonke abatholakale belecala bathathelwe amanyathelo afaneleyo.
Ukumiswa komdlalo obuphakathi kweHardrock leDynamos lo, sekuphinde kwabeka udaba lwezokuphepha enkundleni, kulandela ukukhathazeka ngokwanda kwezehlakalo zodlakela emidlalweni yeCastle Lager Premier Soccer League.
Kusenjalo, amapholisa aseqinisekisile ukubotshwa kwabantu abane abasolwa ngokuphatheka kudlakela lolu.
Amapholisa athe ababotshiweyo nguShingirai Chivavare oleminyaka yokuzalwa engu-34, Matthias Taderera (43), Tavakuda Nyoni (46) lo-Emmanuel Dube (50).
Amapholisa athe uphenyo luyaqhubeka njalo kulindeleke ukuthi kube labanye abangabotshwa mayelana lodaba lolu.
