admin
Cornelius Luphahla
IZAKHAMIZI zezigabeni zeLupane zidlani ebabayo nanko phela inhlanganiso yeLupane Women’s Centre sizifundise ngitsho lokulima izivande emakhaya okuthiwa ngama key hole gardens.
Inhlanganiso le ikhuthaza amalunga ayo ukuba aqhubekele phambili ngokulima izivande lezi ngesizatho sokuzithuthukisa kanye lokuthuthukisa izigaba zazo.
Iphephandaba likaZulu liphuthume layafika kule indawo lakhulumisana lomunye wezakhamizi ezikule inhlanganiso uNkosazana Sifiso Monga ochaze ukuthi izivande lezi zakhiwa zibe zincane kodwa zilosizo kakhulu.
“Izivande lezi sazifundiswa yiLupane Women’s Centre njalo sizakha emizini yethu zibe zincane ukuze senelise ukuzithelela. Noma nje zizincane kodwa ziba lezilimo ezinhle ngoba siyenelisa ukuzifaka umquba ozilingeneyo kanye lokuzithelela njengoba ziyabe zisekhaya.
“Lokhu kwenza senelise ukuthola isitshebo ngoba sandise ukulima imibhida, amatamatisi kanye lehanyanisi,” kutsho uNkszn Monga.
Esinye njalo isakhamuzi sakule indawo uNkosazana Elizabeth Phakathi ubikele intatheli ukuthi inhlanyelo yokuhlanyela lapha bayiphiwa yinhlanganiso le.
“Inhlanyelo yokuhlanyela ezivandeni zethu sihlala siyiphiwa yiLupane Women’s Centre ngakho siyayibonga kakhulu ngoba sesithuthukile kancane ngenxa yayo,” kuchaza uNkszn Phakathi.
UMlawuli wale inhlanganiso uNkosikazi Hildegard Mufukare uchaze ukuthi kunhlanganiso le bajonge ukuthuthukisa isifazana kunhlangothi zonke.
“Njengenhlanganiso sikhangelele ukuthuthukisa omama kuzo zonke indawo ngoba nxa belima izivande lezi kabahlaselwa yindlala yesitshebo labantwana. Okunye njalo izivande lezi kuyavuma ukuthi ozilime kahle athengise izilimo lezi athole imali yokuncedisa ikakhulu kundleko ezidingeka ekhaya kumbe abhadalele abantwana esikolo,” kutsho uNkkz Mufukare.
Online Reporter