Online Reporter
Emnyakeni eyedluleyo umuntu wesifazane ubephathwa njengesigcabha njalo izinqumo abezenza bezibonakala angathi aziqondanga, ubefanele alinde umbono womkakhe abe sethatha isinqumo esivunyelwe ngumkakhe.
Konke okwakumele kwenziwe kwakumele kulindwe inhloko yomuzi engubaba izokwenza lezo zinqumo.
Lezinsuku izinto sezajika mhlawumbe kusenziwa layikuguquka kwesikhathi, omama labo sebelamalungelo abo. Ingqondo yokuthi abasifazane kumele bahlale bengabemkulwini seyaphela nanko phela labo sebevukela emisebenzini.
Abanye njalo bayathengisa balethe imali ngekhaya eyedlula eyabomkabo.
Ngikhumbula omunye umama ehlekwa ngosowabo ezondele ukuthi umkakhe olisotsha uholile kodwa akuhlangani lutho ngolimi lwabontanga, omunye wamphendula esithi; “empilweni kahle kahle wena wenzani?”
Uthe ephendula esithi akula, wabamba owangaphansi emangala wasemxwayisa ukuthi sesadlula isikhathi sokuthi umuntu avuke elele esithi uthembe iholo lendoda.
Omama abanengi imizi imile ngenxa yabo abanye ikakhulu emadolobheni bavuka ngovivi luka
Magadalina esiyabheka uJesu emathuneni besiya emkambo lithi liphuma kunina sebechayile abakuthengisayo, lemaphandleni lakho yiso leso bavuka kuyiwe ezivandeni kuyiwathelezela ithengiswe imibhida lamatamatisi.
Balutshwane omama abasathembele eholweni labomkabo mhlawumbe kubangelwa layikungami kuhle komkhonomi welizwe.
Uzwa bethi izinto azihlangani asazi ukuthi zizahlangana sekutheni, bathi ungazibona lokhe ungumama obhoda ngamaguma uzishwashwata izindaba uze utshise isitshebo uzithatha lapha uzise le uyabe usesemuva kumele uvuke emaqandeni.
Ngake ngamangaliswa ngamandla abanye omama belayitsha amasaka amabhanana emoteni besiyathengisa edolobheni loba esinda kodwa bona babejikela bengagqize qhakala. Lawe ngikutshiyela inqobe yokuthi bona ukuba uyayidlala indima yokuletha inguquko emzini wakho.
Ayixabene
