admin
UKUFA yinto engajwayelekiyo njalo ibangela ukwephuka lokujabha kwezinhliziyo, ufice abantu bemdambiyana, bebunile kungani ngumdandanyane ohaqazwe zinsaba zelanga likaMpandula.
Nxa kuthe kwedlula isitsha esihle umninimuzi uthola amakhehla lezingwevu zimadolonzima. Bekhalelana abeNkosi bephosela amazwi amahle, atshengisa ukuthi loba esethe wadlula emhlabeni kodwa induku yakhe uyifakile ebandla, kudunyiswa imisebenzi yakhe emihle.
Bakhona njalo abantu abathi bengadlula emhlabeni uzwe bethi sebengasese bethi saphumula, wenzile wafa, umthakathi wezigodo kumbe uzwe bethi kuze kwamthola laye waya kogoqwanyawo.
Ekuphileni emhlabeni bakhona abantu abalochuku, abajabula nxa beduba abanye, kungabe kusemsebenzini, abahluphe abangaphansi kwakhe baze bafise ukuthi ngabe bahlala bekukhefu, lapho kumele izisebenzi zengezelelwe iholo enqabe layo sokungani iphuma esiphaleni sakhe.
Abanye ngabahlupha ezabelweni lezigodi esihlala kuzo, aze aphiwe lebizo lobubhanxa elilingisa omunye umuntu owake waphila elolunya, ngikhumbula enye indoda eyayibizwa ngokuthi nguDevuli ngoba yayilolunya lochuku okungedlula yena uSathane uqobo lwakhe, lamzukwane ibhubhile beza ngobunengi ngempela bezozibonela ukuthi ngeqiniso akasekho emhlabeni.
Lawe zama ukuthi nxa usaphila emhlabeni uhlalisane kuhle labanye ukwenzela ukuthi bakukhumbule ngokuhle, kuthi loba utshiye inzalo yakho besale bephathwa ngesandla esibuthakathaka kuhlonitshwa imisebenzi yakho emihle lezibongo zakho.
Kumele unconywe ngamagama athi lafa elihle, esihle kasidleli kumbe latshona ilanga libalele, hatshi ukuthi basale bethi wahamba umgulukudu, ugeva womthakathi kumbe umkhonyovu wesela, lezi inkulumo ezinje zithelela abantwabakho umnyama ngoba bayabe bezondwa ngabantu ngenxa yezenzo zakho ezimbi.
Ayixabene.
Umlobi uthinteka ku 0714355641
Online Reporter