Phos’ elakho: I-gender equality ingabe ikhona na kumbe liphupho nje?

EMINYAKENI edluleyo uHulumende kanye lezinye inhlanganiso ezizimeleyo ikakhulu lezi ezikhangele  ngezokuphathwa kwabesifazana zibematasatasa zizama ukufundisa umphakathi ngokulingana kwabantu kusiya ngobulili babo.

Lapha ngikhuluma ngalokhu abakuthi yi-gender equality ngolimi lwabondlebe zikhanya ilanga. UHulumende lenhlanganiso lezi waqala lumkhankaso ngemva kokunanzelela ukuthi omama abanengi bayacindezelwa ngabesilisa.

Bacindezelwa ezindlini, emisebenzini kanye lakwezombusazwe.

Lokhu kuliqiniso ngoba kusukela lakudala okhokho besabhulela amabhetshu owesifazana ubengumuntu obeseyiswa ngoba kuthiwa ungaphansi kowesilisa sengitsho ngokudalwa kwakhe kanye lokwenza imisebenzi emphakathini.
Ngenxa yalokhu, omama abasebenzayo babenikwa iholo elingaphansi kwelabesilisa ngenxa yobulili babo.

Iloba uHulumende kanye lezinye inhlanganiso ezidabula amazwe zizama ukuguqula lumqondo, lintshumayelo yokulingana kwabomama labobaba kungani ayilampumela enhle ebantwini.

Abantu abakwamukeli lokhu,  sengitsho labo omama mathupha. Omama abakholelwa ukuthi bayalingana labomkabo ngenxa yemfundiso abayithola emabandleni ezokholo kanye lale abayifundiswa besakhula.

Pho kungabe kuyinto ekhona na ukuthi ubaba selingana lomama kumbe liphupho nje?

Mhlawumbe kuliphupho nje elingasoke lifezeke ngoba nganginanzelele ukuthi nxa kukhona okuhluphayo emphakathini kumbe emulini, omama abakholelwa ku-gender equality uyabezwa sebefuqela abesilisa uzwe besithi, “Angithi wena nguwe indoda, mina lokhu angeke ngakwenza ngoba ngingumfazi.”

Pho nxa ubaba eselingana lomama kuyini okwenza abesifazana bavike eminye imilandu abayibona ibasinda ngokuyiphosela kwabesilisa.

Okunye futhi okungisolisayo yikuthi inengi labomama, liqala ukukhuluma nge-gender equality nxa kuphathwa ngezinto ababona zizabalethela inzuzo bona mathupha. Bavusa umhlonga bakhulume ngayo nxa kulento ezabadlisa.

Lokhu mhlawumbe yikho okwenza ukuthi umkhankaso wokufundisa abantu ngokulingana kobulili babo ungaphumeleli ngoba abanye abesifazana bambaxambili.

Ngalokhu abesifazana kumele bawamukele lumkhankaso njalo bazimisele ngawo ngezenzo hatshi ngokukhuluma kuphela. Lamabandla ezokholo lawo kumele enze okufanayo ngoba inengi lawo alikholelwa ku-gender equality.

Akhona amabandla akholwa ukuthi owesifazana ungaphansi kowesilisa ezimulini kanye lasezinkonzweni yikho sibona kwezinye indawo omama bengavunyelwa ukutshumayela.

Yonke le yimigoqo evimba ukuthi lumkhankaso ufezwe ngokugcweleyo.