admin
YiNtatheli kaMthunywa
UCLEOPAS Dube obengumdlali weHighlanders kumasizini amabili adluleyo usebike ukuba usethengwe liqembu leBaroka FC elizachinsa ukudlala kuligi enkulu eSouth Africa.
UDube uzadlalela iBaroka FC okwamasizini amathathu alandelayo, uMthunywa ukuzwile lokhu. Umdlali lo kuzwakale ukuthi uzangenela indawo yomgadli weBaroka uThabiso Kutumela osesiya kuOrlando Pirates.
Ekhuluma lephephandaba likazulu ngoLwesithathu, uDube owayedume ngelithi “Balotelli” kubalandeli beHighlanders uveze ukuthi uzizwa ejabula ngokuthengwa liqembu leli.
Ubike ukuba ukungena kwakhe kuBaroka kuyisitshengiselo sokuthi umdlalo wakhe uyabonakala kumathimu aphetsheya.
“Sengizadlalela ithimu okuthiwa yiBaroka FC. Iqembu ebengilidlalela kusizini edluleyo eleWitbank likhethe ukuthi lehlukane lami ngoba izikhulu zeBaroka bezihlose ukuthi ngibengumdlali wazo.
“Lokhu yikuqala kwezinye inhlelo engilazo kusizini ka2017 ngikuBaroka. Ngijabuliswa yikuthi amaqembu eSouth Africa ayangibona ukuthi ngingumdlali olethalenta,” nguDube lo ekhuluma eseSouth Africa.
Uqhubeke wathi loba ejabuliswa yikungena kuqembu elitsha, ubeseqale ubudlelwano obutsha leWitbank.
“Ngizayikhumbula iWitbank Spurs ngoba yiyo ithimu eyangenza ngabonakala kunguqu yeSouth Africa.”
UDube wahlohla amabhola angu-13 ngesizini edluleyo kuligi yeNational First Division, okwenza waphiwa isicoco sokuba ngumdlali wesibili ohlohle amabhola amanengi.
Online Reporter