Online Reporter
Kulandela ukwedlula emhlabeni kukaNdondo akuzange kube lokuthula emzini wakhe. Kungayisikho ukuthi wayepoka kumbe babembona ebusuku elithonga, kodwa umkakhe wayesethwaliswe nzima ngabantwana sebezenzela umathanda.
Kulelikhaya inhloko yomuzi isawadla amabele kwakuphilwa ngesizotha njalo uMvelingqangi wayesesatshwa, kuphilwa ngokukhuleka kuyiwa ezinkonzweni maviki onke. Kwakusiba licala ukuthi nxa ulilunga lemuli yakhe ungayi esontweni.
Izihlobo zikaNdondo ezigoqela abafowabo labodadewabo labo bavukela umkaNdondo ukeketani bethi akahambe kibo ngoba esesemncinyane ulakho ukwenda, besenza angani bayamzwela betsho besinya sebengenwe ngumoya wobugovu befuna impahla zomufi.
Phela uNdondo wayeyindoda emadodeni elezinto zakhe, futhi labantwabakhe sebezisebenzela. Ngenxa yokuthi kwakuhlala kuvunguza isavunguzane kuleliguma sekuphilwa ngokuxabana, labekwa ilanga lokuthi impahla zomufi zichithwe, munye nje uyisomncane owayesima lomkaNdondo, lathi selifikile ilanga, umkaNdondo wakhipha incwadi zakhe zomtshado ezikhomba ukuthi ulamandla okulawula impahla yomkakhe, waqala ngokwabela abantwabakhe, omunye lomunye waqala ngokumnika ayekuthengele uyise esaphila, kwasekungani babiselwa khona kanye abakuthengayo. Izibulo lakhe ngoba lona lalimthengele amanyathela laphiwa wona, lazonda lakhukhumala amehlo ababomvu gebhu okwelahle lakoLoliwe.
Odadewabo labafowabo bomkakhe bethi bayakhwaza wahle wathi kabathule cwaka okomvundla osebone ukuthi umzingeli uyedlula engamboni njalo akula lutho azabanika lona ngoba ngamandla akhe lomkakhe, omunye lomunye kasebenze okwakhe hatshi ukunqwethela amandla abanye njengemamba efika iziphe ikhaya emlindini engakwaziyo lokuthi umbiwe ngubani.
Kukanengi sisizwa emsakazweni sikubala lakumaphephandaba abantu begamulana ngamabhemba lamahloka kubangwa impahla zomufi. Abanye baze bayalanyulwa ngumthethwandaba phela wona unganquma unqumile.
Omunye umfowabo kaNdondo wazonda waba ngokunye ngoba yena wayecabanga ukuthi nguye osezakhethwa ukuthi angene umfelokazi, phela wayebunjiwe umkaNdondo nomanje wayesemnkantshubomvu impawu ezikhomba ukuthi ebutsheni bakhe wayelivithikazi zazisekhona.
Ngempela badana babuna okwamaluba ahaqazwe lilangabi lensaba zelanga lebusika ngenyanga kaMpandula ngoba izinto sezihambe ngendlela ababengayinakaneli. Wabanika nje okungatsho lutho inengi lenotho wasala layo njalo wafunga ukuthi ngeke aphume emzini womkakhe ngaphandle esethwelwe yimota ethwala izidumbu esefakwe amaluba esifubeni esesiyangcwatshwa eceleni komkakhe.
Ayixabene
