Online Reporter
Kulomhlabeleli owayelodumo oweqembu leSoul Brothers elizweni laseNingizimu Afrika, wayethi nxa ecula ingoma ethi, “Ubosebenz’ ubuye ndoda ekhaya kuyonakala,” kuqumba qumbeke wonke osebenzayo esekhumbula kibo.
Isikhathi sekhefu leKhisimusi sesisondele, sezizathululeka injiva ngobunengi. Zonke lezikade zacina ukubuya ekhaya, lezinye ezibuya njalo nje.
Zikhona ezingomahamba mlibe ezibuya gqo kumbe ezivame ukulethwa yikuzwa umbiko wemfa lakho futhi kuyabe kubhubhe umzali kodwa kungesikho lokho khohlwa uphinde ngokuphenduka kwazo ekhaya. Yizo ke lezo ezijayele ukuqamba amanga aluhlaza tshoko okwenyongo yenkunzi yenyathi edle umahamba ngendlwane.
Lezi zivame ukubuya zingela lutho sekungani ngumuntu ozivelela khama ithumbu, uzwa kwesinye isikhathi kuthiwa bekunzima emngceleni bathethe yonke impahla, kumbe uzwe kuthiwa umalayitsha udlule lempahla uzabuya lazo.
Lidlale iKhisimusi ngenqweqwe zomlomo, nxa kuyilezi ezingela ncwadi zokuhambisa ezichapha ngapha uzwa kuthiwa sidibane lendlovu bamane baphaphatheka kwamotshakala yonke into.
Kulomunye umzawami ojwayele ukuthi ulenkampani yakhe njalo ujwayele ukuthi atshele abafana besigaba ukuthi ngabe balamapasipoti aluba uyahamba labo ayebaqhatsha eMzansi, manje lonyaka kabuzanga elangeni ngoba kulabambalwa abalawo sizabona ukuthi iyozala nkomoni ngoba abasiki bebunda bathi ungumalalephayiphini, udla ngokuholelwa ngabamasonto.
Abanye benze njalo lemakhaya ngapha abalangubo zokwembatha, abanye njalo lezindlu zokulala ziyabe zisilela uthole indoda endala ilala exhibeni labafana, ezinye zendlalelwe emkulwini ufice umlilo usubaselwa egumeni ngoba emkulwini kulele umuntu wemzini oze eyatha.
Isimanga yikuthi ezinye zakhona zibuya zicwebezela zifake lamazinyo egolide uthi kumbe ngabaphila ngokubamba inkunzi njalo uyathi ebuye engelalutho afune ukuhlatshelwa imbuzi, lithi lingamhlabela esesizwa ubunandi bamalulu, athembise ukuthi nxa efika ngeviki elizayo lakhona uzathumela yonke into efunekayo, ngapha umuntu wakhona umakhalekhukhwini uyabe semthengisile ukuze athole eyokukwejisa labangane, kuthi lapho sekumele abuyele abazali bacine bengena esibayeni, ubesuzibuza ukuthi nguye lo othi uzathumela yena esehlulwa yikuzigadisa.
Ngikhumbula omunye umngane wami, ngavakatshela eGoli ngasengithi njengoba ngilenombolo zakhe zendlu ayethi uhlala kuyo ngamfikela elibele, kanti unkalakatha uhlala emkhukhwini, izindlu lezi ezikhandwa ngamazenge, ngamangala esengicela lentshintshi yebhasi ethi akalalutho kodwa inyanga yayiphelile ngahle ngayifunda ivaliwe, ngahle ngavalelisa ngabuyela lapho engangifikele khona ngoba laye wayesephethwe lazinhloni esekhumbula amanga ayengitshela wona sisekhaya.
Isixwayiso sami sithi kungangcono ume ukubuya ekhaya uqale uqogelele imali zokubuya ekhaya amakhefu manengi, kulekhefu lePhasika kulo kuthi uthwalise nzima abantu ngoba ekhaya isimo somnotho asimanga kuhle indlala inkulu.
Lonyaka asifuni kuqanjelwa amanga sesikhathele ngawo.
Ayixabene.
