admin
Mehleli Dube
Isintu sithi oludobhayo ngoluzulayo, ukuhamba kuzala induna siphinde sithi esomhambi isisu asinganani, singangophonjwana lwembuzi, babekutsho lokhu ngoba abadala baphila kudala kulathi, basebekubonile, ngawabo amehlo mathupha.
Empilweni ekuhambeni ufunda okunengi njalo uphinde ubone okuhle lokubi.
Ngake ngathi ngivakatshele emaguswini komnyama ubambile ngiyecela umlilo komunye umuzi. Ngangithunywe ngabakoMpangazitha ngoba indodana yabo yayile ngoduso yayo kulumuzi.
Ngafika ngamukelwa ngesihle isandla esinesizotha, kwakujatshuliwe lapha ekhaya lenkukhu zakhona ziqhwayaqhwaya zingagqize qhakala zizidlela amatheza ethangweni lomuzi, kwakuyinxuluma yomuzi kukhomba obala ukuthi le yindoda emadodeni ngoba ifuyile.
Njengoba lapha ekhaya udaba engangihamba ngalo babelwazi ngangeniswa exhibeni lamabhungu, saxoxisana labadala lezimali ngabanikeza engangithunyiwe ukuzocela umlilo ngazo.
Bajabula, bathaba babamanzi te ngoba intokazi yabo yenze into enhle ingendanga ngesisu.
Njengoba ngangifike emini yantambama lahle labanjwa iqhude elesitshebo somuntu wemzini lomphako nxa sengiphindela ngakusisa.
Kwathi kusithi hwalala baletha ukudla kwakusihlwa, kulethwe yiyo ingoduso, phandle kwakudlala okungokhekhe, kwakulokhe kulunguza ngomnkenke wesivalo, kwezwakala okunye kusithi umuntu wemzini angatshiya isitshwala ngesami, sokusilwa phandle kukhala, kwaba nzima kimi ukuthi ngidle ngiqede noma nje iphango lalingibulele.
Bazama ukuthi bakunqande umntwana engumntwana kwahle kwangena kuzothatha imiganu kukhukhuza lamathambo engangiwaphosele eceleni kwesitshwala.
Ayixabene.
Umlobi uthinteka kunombolo ezithi: 0714355641
Online Reporter