admin
Nxa usafundela ukutshayela imota, ukuyivusa emqansweni kuyinkinga enkulu kakhulu. Amanye amabhasi amadala athi angafika emqansweni kuyehliswa abantu ukuze enelise ukukhwela ikakhulu nxa evele ethwele. Ngithe ngifuqa inqola yami ngithengisa izithelo lemibhida lami ke ngakhona ngikuzwa ukuthi kubuhlungu kanganani ukuqansa.
Izicathulo ziyaphela izithende zidliwe ngumgwaqo, isifuba siyatshisa, ingalo zome qha njengesihlahla senkangala, ikhanda lijuluke izithukuthuku, lesisu sibophane sagoda. Ubuso buyantshintsha kube sengathi ngumuntu omumathe isihaqa, ubhense usabhensa, inqola ike ikufuqele emuva, kuthi nxa izicathulo zinganyathelanga kuhle uyavuka phansi, kube njalo uze uyefika esiqongweni.
UGabi waba lenhlanhla yamaswazi, phela wangena kanye kuleya ndlela etholwa ngabayingcosana. Ngokubona kwabanengi wayeseyibambile indlela, eyiqale kakuhle, ethsitsha kamnandi, bonke babethi kayi kudinwa ngoba ekhanya ezimisele kulolo hambo. Wasesithi esephambili, wayingena ke indlela egcwele amatshe lameva, wahamba ezimisele esathi kumbe kuzakuba ngcono, kodwa phinde!
Kwaze kwafika kuye ukuthi athi angahlatshwa ake ahlale phansi akhokhe umoya, qede alingene igusu esithi kumbe sengathola umqokolo anontshele emlonyeni, kodwa izihlahla zonke zazikhanya ziqanda okwekhala lenja, kuthi lomhlabathi wakhona wawukhanya wome okokuthi akula themba lokumba umgodi wamanzi. Kusenjalo kwakusisa kuye ukuthi wayesesiba nguzulani nje egangeni sengathi ngumhambume ongela lwazi lalapha aya khona, abe seyibuyelela indlela yakhe.
Ngiyazi usuke waba sezicathulweni zika Gabi, ukuthi ufumane intuba ebazelwe wena ngqo, kodwa uthi usuphakathi kuvuthe okweziko lokuncibilikisa igolide. Inhlupho lenkulumo ezimbi zikuhlabe okokuthi umphimbo uyoma, lezandla zilume kudinga ongabhodlisela kuye kodwa aswelakale. Usuke wakhahlanyezwa yisimo sakuwisela phansi, usuke wafikelwa ngumcabango okuthi kungangcono ulahle ikhuba.
Kuyatholakala vele ekuhambeni.UGabi ehlangana lakho konke lokhu wayengakafiki la asekhona manje, emqansweni. La asekhona manje, umqwaqo muhle impela engathi uzadliwa, umnyama khaca okomtshankela, khona ilanga nxa libayima kungathi kulamangilazi phezu kwawo, kumbe amachibi amanzi amahle, kodwa woza kuqansa!
Kusemqansweni onjalo lapho inkalo kumele zibotshwe abalamabhulugwe agoqwe, abalezidwaba zikhwincwe, kuthunqe uthuli enzikini yomgwaqo. Ayisikho konke okukhangeleka kukuhle emehlweni okulula ukwenza, umqanso unjalo. Indlela onyathela ngayo, obamba ngayo okuphetheyo, osunduza ngayo okusunduzayo kayifani lansuku zonke ngoba lo ngumhlaba olidundu owukhwelayo.
Ubunandi ke bulapha, phezulu esiqongweni la oya khona amehlo azabona ngcono kulalaba abaphansi, inhliziyo izachelesa ngoba usufikile kulelo zinga eliphakemeyo, amakhala azajabula lawo esephefumula umoya ohlambulukileyo, owehla ngompimbo uqumbaqumbe amaphapho. Kubeke lokhu emkhumbulweni wakho ngesekhathi uqansa umqanso!!!
Thintana lo Trevor Mhlanga kunombolo zikamakhal’ ekhukhwini ezithi: +263 775 523 605
Kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
Online Reporter